Gürcüstan Milli Bankının qərarına əsasən, 2025-ci il avqustun 1-dən etibarən gəliri milli valyutada – laridə olan Gürcüstan vətəndaşları üçün ipoteka krediti şərtləri daha da sərtləşdirilir.

Xüsusilə, əgər bir Gürcüstan vətəndaşının gəliri laridədirsə və o, bankdan xarici valyutada kredit götürmək istəyirsə, bu yalnız 750 000 lari ekvivalentindən çox məbləğ üçün mümkün olacaq. Əgər bu məbləğdən az kredit istəyirsə, o zaman xarici valyutada kredit ala bilməyəcək.

Hazırda (2025-ci il yanvarın 1-dən) bu məhdudiyyət 500 000 lari həddində qüvvədədir.

Əvvəlki dəyişikliklər:

• 2017-ci il yanvarın 20-dən başlayaraq, xarici valyutada kreditlərə məhdudiyyətlər tətbiq olunmağa başladı – ilkin limit 100 000 lari idi;
• 2019-cu il yanvarın 23-dən limit 200 000 lariyə qaldırıldı;
• Daha sonra 400 000 lariyə, 2025-ci ildən isə 500 000 lariyə qədər artırıldı.

Xarici valyutada – avro və dollarla verilən kreditlər, laridə verilənlərlə müqayisədə daha aşağı faizlərlə təklif olunur.

Məsələn, ipoteka kreditlərində illik effektiv faiz dərəcəsi laridə təxminən 15%-dən başlayırsa, dollarla bu rəqəm təxminən 10%, avro ilə isə təxminən 8%-dir.
Lakin son faiz dərəcəsi bank və müştəri arasında fərdi razılaşma ilə müəyyən edilir.

Əgər kredit götürüləndən sonra milli valyutanın məzənnəsi cüzi dəyişərsə, xarici valyutada kredit daha sərfəli ola bilər.

Lakin kəskin devalvasiya halında, laridə ödəməli olan aylıq məbləğ ciddi şəkildə arta bilər – bu da risklər yaradır. Belə hallar illər əvvəl də müşahidə olunub.

Bu qərar, 2025-ci il mayın 27-də keçirilmiş Gürcüstan Milli Bankının Maliyyə Sabitliyi Komitəsinin iclasında qəbul olunub və 2025-ci il avqustun 1-dən qüvvəyə minəcək.
20 gün əvvəl, mayın 7-də, Milli Bankın Pul-Kredit Komitəsi faiz dərəcəsini (refinanslaşdırma dərəcəsi) dəyişmədən 8% səviyyəsində saxladı.

İllik inflyasiya hədəfi 3% olsa da, aprelin göstəricilərinə əsasən illik inflyasiya 3,4% təşkil edib.

Mayın 7-də yayımlanan son hesabatda deyilir ki, “qlobal iqtisadi qeyri-müəyyənlik fonunda inflyasiya üzərində həm artım, həm də azalma istiqamətində təsir edən risklər müşahidə olunur”.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---