Jurnalist və media meneceri Mzia Amağlobelinin işi üzrə əsas məhkəmə prosesi sabah, 30 may tarixində, saat 13:00-da Batumi Şəhər Məhkəməsində davam edəcək.

Mzia Amağlobeli “Batumelebi” və “Netgazeti” nəşrlərinin təsisçisi və direktoru olub. O, bir polisə sillə vurduğu üçün prokurorluq tərəfindən polisə hücumda ittiham olunur. İttiham sübuta yetirildiyi halda, onu 4 ildən 7 ilədək azadlıqdan məhrumetmə cəzası gözləyir.

Mzia Amağlobeli təxminən 5 aydır ki, hüquq müdafiəçilərinin və hüquqşünasların qiymətləndirməsinə görə, qanunsuz həbsdə saxlanılır.

30 mayda keçiriləcək məhkəmə iclasında hakim Nino Saxelaşvili müdafiə tərəfinin şahidlərini dindirəcək. Prokurorluğun şahidlərinin dindirilməsi artıq başa çatıb.
Prokurorluq əvvəlcə bu iş üzrə daha 8 şahidin dindirilməsini planlaşdırsa da, sonradan məhkəmənin təsdiqlədiyi siyahıdakı bəzi polislərin dindirilməsinin artıq zəruri olmadığını qərara alıb. Dindirilməsindən imtina edilən şahidlərdən biri, məsələn, polis Vladimir Çitaia idi. O, Quriyanın polis rəisinə bildirib ki, guya Mzia Amağlobeli “təlimatlar alırmış” və “hücum əvvəlcədən planlaşdırılmışdı”. Lakin onun da dindirilməsindən prokurorluq imtina edib.

Bundan əvvəl keçirilən məhkəmə iclaslarında şahid qismində dindirilmiş polis məmurları və rəsmilər müdafiə vəkilləri tərəfindən yalan danışmaqda ifşa olunublar. Məsələn, zərərçəkmiş kimi tanınan İrakli Dqebuadzenin müavinlərindən biri – Qoça Vanadze – hakiminə bildirib ki, Mzia Amağlobeli polisə qarşı təhqiramiz davranışa görə saxlanılıb. Digər müavin – Qiorqi Bjalava isə onun stiker yapışdırdığına görə tutulduğunu deyib.

Bu işdə zərərçəkmiş kimi göstərilən Batumi Polis İdarəsinin rəisi İrakli Dqebuadze isə 8 mayda dindirilib. O, məhkəmədə bildirib ki, “ağrı hiss edib”.

İrakli Dgebuadzenin ifadəsindən mühüm detal: Dindirmə zamanı İrakli Dqebuadze etiraf etməyə məcbur olub ki, Mzia Amağlobeliyə söyüş söyən və ona təhdidlər yağdıran polis əməkdaşı özü imiş. “Qanı ilə tutaram... onun anasın….,” – deyə 12 yanvar tarixli videoda eşidilir. Həmin videoda saxlanılan qadını iki polis aparır, arxasınca isə İrakli Dqebuadze gəlir və söyüş söyür.
İrakli Dqebuadzenin törətdiyi ehtimal olunan cinayətlərlə bağlı Xüsusi İstintaq Xidməti heç bir tədbir görməyib – Mzia Amağlobeli və 2025-ci il 11 yanvar aksiyasında iştirak edən digər şəxslər onu qeyri-insani rəftar və zorakılıqda ittiham edirlər.

28 aprel tarixində keçirilmiş məhkəmə iclasında isə Acarıstan Polis Departamentinin keçmiş rəisi Qriqol Beselia dindirilib. Digər polislər kimi, onu da Mzia Amağlobelinin vəkilləri yalan ifadəyə görə ifşa ediblər.

Məsələn, Qriqol Beselia ifadəsində bildirib ki, Mzia Amağlobeli barəsində inzibati hüquqpozmaya dair 150-ci maddə ilə protokol tərtib olunub. Lakin o bunu deyəndə – yəni 2025-ci il 28 aprel tarixində – belə bir protokol mövcud deyildi. Qriqol Beselia indi artıq Cinayət Polisi Departamentinin rəis müavinidir.

Onun bu ifadəsindən cəmi iki gün sonra – 2025-ci il 30 apreldə polis əməkdaşı Nodar Zenaişvili Mzia Amağlobeli əleyhinə yeni raport yazıb. Qeyd edək ki, o, daha əvvəl Mzia Amağlobeliyə qarşı saxtalaşdırılmış inzibati iş üzrə yalan ifadə vermişdi.

Stiker yapışdırma işi üzrə isə, hakim Salix Şainidze, saxta sənədlərə baxmayaraq, Mzia Amağlobelini hüquqpozan kimi tanıyıb və ona 2 min lari cərimə kəsib. Eyni hərəkətə görə, indi DİN Mzia Amağlobeliyə qarşı yeni maddə ilə təzə inzibati iş açıb. Bu işi hakim Marianna Fomayeva 9 iyunda araşdıracaq.

Hüquq müdafiəçiləri və peşəkar hüquqşünasların fikrincə, Mzia Amağlobeli qanunsuz həbs olunub, çünki ittihamlar qanunsuzdur və sillə vurmaq nəinki hücum sayılmır, ümumiyyətlə, cinayət deyil.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---