Gürcüstan Milli Bankının hazırkı prezidenti Natia Turnava 2024-cü ildə – bank rəhbərinin vəzifələrini icra etdiyi dövrdə – ümumilikdə 349 040 lari qazanıb. Bu barədə məlumat 2025-ci il aprelin 29-da doldurduğu əmlak bəyannaməsində yer alıb.

Bu, o deməkdir ki, Turnava ötən il ayda orta hesabla 29 086 lari maaş alıb.


Bəyannamələrin yerləşdirildiyi rəsmi portal təxminən altı ay ərzində fəaliyyət göstərmirdi. Antikorrupsiya Bürosu bu problemi “texniki nasazlıq” adlandırırdı. Portalın fəaliyyəti yalnız "Gürcü Arzusu" hökumətinin baş naziri İrakli Kobaxidze ilə aparılan kommunikasiya fonunda bərpa olundu.

Bəyannamənin məzmununa əsasən, Natia Turnavanın güclü maliyyə imkanları var – onun “Gürcüstan Bankı”nda açılmış depozit hesabında 100 000 avro saxlanılır. Digər bank hesablarında isə daha kiçik məbləğlər qeyd olunub.


Turnava 375 000 ABŞ dollarına “Tibbi Profilaktika Mərkəzi” MMC-nin 15%-lik payını satıb, 150 000 lari oğluna köçürüb, 80 000 lari isə müalicəyə ehtiyacı olan qohumuna verib. Mənzilin təmirinə isə 262 000 lari xərcləyib.


Natia Turnava həyat yoldaşı Davit Veşapidze ilə birlikdə, bəyannamənin doldurulduğu anda, bank seyfində xeyli məbləğdə nağd vəsait saxlayıb: 500 000 ABŞ dolları, 50 000 avro və 90 000 lari.


O, 2023-cü ilin iyunundan 2025-ci ilin fevralınadək Gürcüstan Milli Bankının birinci vitse-prezidenti və prezidentin vəzifələrini icra edən şəxs olub. 2022-ci ilin iyun ayından isə bankın idarə heyətinin üzvüdür.

İxtisasca iqtisadçı olan Natia Turnava illər ərzində həm dövlət, həm də özəl sektorda yüksək vəzifələrdə çalışıb. O, Gürcüstanın iqtisadiyyat və dayanıqlı inkişaf naziri, bundan əvvəl isə nazirin birinci müavini olub. Həmçinin, Dövlət Tərəfdaşlıq Fondunun icraçı direktorunun müavini və “Gürcüstanın Beynəlxalq Enerji Korporasiyası” MMC-nin baş direktoru və Direktorlar Şurasının sədri olub.

“Milli Hərəkat” hakimiyyətdə olduğu dövrdə də Turnava İqtisadiyyat Nazirliyinin birinci müavini (2005–2006) idi. “Gürcü Arzusu”nun hakimiyyətə gəlməsinə bir neçə ay qalmış, 2012-ci ilin avqustunda “Milli Hərəkat”a 35 000 lari ianə edib.

Koba Qvenetadzenin Gürcüstan Milli Bankının prezidenti vəzifəsindən getməsindən sonra, qanunda edilən dəyişikliklə prezidentin seçilmə qaydası dəyişdi və yeni – birinci vitse-prezident vəzifəsi yaradıldı.

2023-cü ilin sentyabrında bankın üç vitse-prezidenti və prezidentin müşaviri istefa verdi. Bu hadisədən əvvəl Natia Turnava ABŞ sanksiyalarına baxmayaraq, Gürcüstan vətəndaşlarının maliyyə resurslarına çıxışını məhdudlaşdırmamaq barədə qərar qəbul etmişdi. Bu qərar, keçmiş baş prokuror Otar Partxaladzenin ABŞ sanksiyalarına məruz qalmasından sonra verilmişdi.