Uzun zamandır davam edən koronavirusa görə insanlar evlərindən çıxa
bilmirlər.
Rayonlarda, kəndlərdə və bir çox yerlərdə giriş-çıxışa qadağalar
qoyulub. Koronavirusun qarşısının alınması məqsədilə dezinfeksiya
işləri aparılır. Həmçinin bir çox kəndlərdə həkimlər ev-ev gəzərək
insanları yoxlayırlar.
Yoxlanılan kəndlər sırasında bu gün Marneuli rayonunun Keşəli kəndi
də var idi. Yoxlama zamanı əgər koronavirusun hər hansı bir əlaməti
aşkarlanarsa, həmin şəxs təcili surətdə xəstəxanaya aparılaraq
karantinə alınır və testlərdən keçirilir.
Bəs Keşəli kəndində koronavirusun hər hansı əlamətinə rast
gəlinibmi? Kənd sakinləri qaydalara əməl edirlərmi?
Bununla bağlı Keşəli kəndində sorğu keçirdik.
Bu gün, kənddə tibbi yoxlanışlar keçirən 3 həkimin sözlərinə görə,
bu kənddə koronavirusun heç bir əlamətinə hələ ki rast gəlinməyib.
Buna arxayın olan kənd sakinləri isə öz işlərində olduqlarını və
heç nədən qorxmadıqlarını dedilər.
Kənd sakinlərinin sözlərinə görə, Qırmızı körpü sərhədindən 15 km
məsafədə yerləşən Keşəli kəndi sərhədə yaxın olduğu üçün daha çox
yoxlama keçirilir.
“Çox şükür ki, bu vaxta kimi heç nə tapılmadı. Ümid
edirik bundan sonra da heç kimə heç nə olmaz. Çünki Keşəlidə
yaşayan hər kəs bir-birinə yaxın və mehribandırlar. Biz də
bacardığımız qədər qaydalara riayət edirik", – kənd
sakini dedi.
Qeyd edək ki, Keşəli kəndində təxminən 1000 ev var, əhalisinin sayı
isə 5000 nəfərdir.
Burada yaşayan kənd sakinləri gəlirlərini istixanalardan əldə
edirlər. Buna görə də satış üçün kənddən çıxaraq şəhərə getməli
olurlar. Lakin virusa görə onlar heç yerə gedə bilmirlər.
Xatırladaq ki, koronovirusa görə Bolnisi və Marneuli bələdiyyələri
ciddi karantin rejiminə keçib.