Bu gün, 16 iyul tarixində Marneulidə Vaja Pşavela və
Ağmaşenebeli küçələrini su basıb.
Su sakinlərin yaşayış evinə dolub. Təbii fəlakət nəticəsində
yaşayış evlərinin birinci mərtəbəsinə su dolub, kənd təsərrüfatı
məhsulları məhv olub və əhalinin bir qisminin ev quşları ölüb.
“Saat 7-yə işləmişdi, səs-küy, qışqırıq başladı və
qapının döyülməsinə yuxudan oyandıq. Sel, sel deyirdilər. Qapıları
açdıq ki, yuxarıdan sel gəlir. Evə doldu. Zirzəmini tamamilə su
basıb. Cücə və toyuqlar hamısı ölüb. Mebel də xarab olub. 2018-ci
ildə də baş vermişdi, onda da hər şey xarab olmuşdu. 2012-ci ildə
də belə idi. Yiyəmiz yoxdur, heç kim gəlməyib. Deyəndə ki, girin
içəri baxın, dedilər, nə mənası var”, – zərərçəkmiş
Zoya Kiknadze bildirdi.
Marneuli meri Zaur Darğallı təbii fəlakətdən zərərçəkmiş ailələri
səhər saatlarında ziyarət edib. “Avropalı Gürcüstanın” üzvü Əhməd
İmamquliyev də hadisə yerində olub. Onun sözlərinə görə, Marneuli
meriyasının nümayəndələri zərəçəkmiş əhaliyə kömək etmək üçün heç
nə etmir.
İmamquliyev əhali ilə görüşdən sonra Marneuli meriyasına merlə
görüşə gedib.
“Mən bu məsələ ilə bağlı merlə görüşmək istəyirdim. Biz
başa düşürük ki, insanıq və təbii fəlakəti dayandıra bilməzdik,
amma merin bizim büdcədən pul ayırmaq hüququ var. Həmin pulla
əhaliyə müvəqqəti yardım göstərə bilərik. Bu deməkdir ki, ilk
növbədə qida, içməli su və yaşayış yeri ilə təmin edilməlidirlər,
yəni mehmanxanaya yerləşdirilsinlər. Səhər bizim marionet merimiz
guya orada olub və deyib ki, komissiya yaradılacaq, onlar məsələyə
baxacaqlar. İndi uşaqlar su istəyir, onlara yemək lazımdır, buna
hansı komissiya lazımdır”, – Əhməd İmamquliyev
“Marneuli” radiosu ilə söhbəti zamanı bildirdi.
Marneuli meri Əhməd İmamquliyevlə görüşməyib. Marneuli meriyasının
İnzibati Xidmətinin rəhbəri Nino Dekanoidze İmamquliyevlə söhbəti
zamanı bildirib ki, Marneuli meri görüşdədir, təbii fəlakətdən
zərərçəkmişlərlə bağlı isə meriyanın məlumatı var və artıq işlər
aparılır.
“Komissiya yaradılıb və hadisə yerinə gediblər. Yerli özünüidarə
işləyir. Səkkizin yarısından hadisə yerinə gediblər və faktlar
komissiya tərəfindən qeydə alınır ki, protokolda zərər qeyd
olunsun”, – Nino Dekanoidze bildirdi.
Marneuli meriyasının İctimaiyyətlə Əlaqələr Şöbəsinin rəhbəri
Mariam Xaçidze bildirdi ki, hadisə yerində meriya əməkdaşları ilə
yanaşı Fövqəladə Halların İdarəolunması Xidməti də çalışır və
evlərdən su çəkilir.