Marneuli kollecində gürcü dilinin tədrisi 1+4 proqramından daha keyfiyyətli olacaq – Təhsil nazirinin müavini
17:03 / 10.06.2021
Bu gün, 10 iyun tarixində, Marneulidə "Modus" kollecinin açılışı
ilə əlaqədar tərəfdaş təşkilatlar və biznes nümayəndələri ilə görüş
keçirilib.
“Modus” kollecinin direktoru Pavle Tvaliaşvili "Marneuli" radiosu
ilə söhbəti zamanı bildirdi ki, Marneulidə kollec bu il fəaliyyətə
başlayacaq. Qəbul yayda elan olunacaq. Ancaq ilk tələbələr payızda
qəbul ediləcək.
"Kollec peşə proqramları həyata keçirən təhsil
müəssisəsidir. Biz bu gün peşəkar kadra ehtiyacı olan yerli
işəgötürənlərlə, biznesmenlərlə görüşürük. Görüşün məqsədi yerli və
beynəlxalq ictimaiyyətə kollecin peşə proqramlarını həyata keçirmək
üçün hazır olduğunu göstərməkdir. Tərəfdaş olaraq biznes və dövlət
strukturlarını, beynəlxalq təşkilatları dəvət
etmişik", – Pavle Tvaliaşvili bildirdi.
“Modus” kollecinin Marneulidə həyata keçirəcəyi proqramlar işlə
təmin edilməyə istiqamətlənəcək.
Kollecin Marneuli meneceri Nino Mtvarelidze “Marneuli” radiosu ilə
söhbəti zamanı bildirdi ki, oktyabrdan kənd təsərrüfatı
istiqamətində peşə proqramları həyata keçiriləcək.
"Bu proqramlar meyvəçilik, tərəvəzçiliyi əhatə edir.
Eləcə də təhsil almaq istəyənlər bizim bazada elektrik, regional
turizm bələdçisi, mühasib, informasiya texnologiyaları, dayəlik
kimi əmək bazarında tələb olunan peşələrə də yiyələnə bilərlər. Bu
proqramların hamısı dövlət tərəfindən maliyyələşdirilir",
– Nino Mtvarelidze bildirdi.
Görüşdə Təhsil və Elm nazirinin müavini Tamar Kidiaşvili də iştirak
edirdi. O, bildirdi ki, Marneuli bələdiyyəsi Gürcüstanda iqtisadi
artım dinamikası ilə fərqlənir və buna görə, bələdiyyədə peşə
təhsili almaq imkanının yaradılması çox mühüm idi. Onun
açıqlamasına görə, kollecdə böyüklər və gənclər təhsil ala biləcək
ki, iqtisadiyyat müasir standartlarla hazırlanmış kadrları daha tez
qəbul etsin.
“Biz artıq kollecin açılışı üçün hazırlaşırıq. Sentyabrdan artıq
kollec açılacaq və ilk tələbələri qəbul edəcək. Eləcə də böyükləri
hazırlıq proqramında gözləyirik. Bu gün çox vacib görüş baş tutdu.
Görüşdə işəgötürənlər, eləcə də yerli özünüidarə nümayəndələri
iştirak edirdi. Bələdiyyənin ehtiyacları ilə əlaqədar, nəyə daha
çox diqqət yetirməli olduğumuzla bağlı müzakirələr aparıldı.
Regional ehtiyacların qarşılanması üçün nazirlik tərəfindən tam
dəstək elan edildi”, – Tamar Kidiaşvili bildirdi.
Kollecdə tədris prosesi gürcü dilində aparılacaq. “Marneuli”
radiosunun qeyri-gürcüdilli əhalinin peşə təhsili alana qədər gürcü
dilində hazırlıq kursları keçmək imkanı olub-olmayacağı ilə bağlı
sualına cavab olaraq nazir müavini bildirdi ki, kollecdə
qeyri-gürcüdilli əhalinin hazırlanacağı proqram 1+4 proqramından
daha keyfiyyətli olacaq.
“Burada daha sürətli gürcü dili proqramları təklif olunacaq. Bizim
tətbiq edəcəyimiz bu proqram və bu yanaşma ali təhsildə 1+4
proqramından daha keyfiyyətli olacaq. Gürcü dili proqramı qarışıq
prinsiplə, keyfiyyətli, distant və canlı olacaq. Əvvəldən axıra
kimi iştirakçılar üçün nəzərdə tutulacaq və müvafiq olaraq
gənclərə, eləcə də böyüklərə gürcü dilini öyrənmək imkanı
yaradacaq. Bundan sonra onlar bir il ərzində müxtəlif peşə
proqramlarına qoşula biləcəklər”, – Tamar Kidiaşvili
qeyd etdi.
Kollecdə təhsil almaq istəyən şəxslər 5 iyul tarixindən ərizələrini
təqdim edib qeydiyyatdan keçə biləcəklər.