Bu gün, 14 iyun tarixində, vətəndaşlar Marneuli “Geo Hospitals”
Doğum Evi və Ambulatoriya Mərkəzinin həyətində süd vəzisi xərçəngi
proqramı ilə nəzərdə tutulmuş müayinədən keçə bilərlər.
Gürcüstan Milli Skrininq Mərkəzinin direktoru Eter Kiğuridze
“Marneuli” radiosu ilə söhbəti zamanı bildirdi ki, əhaliyə süd
vəzisi xərçənginin skrininq proqramı ilə nəzərdə tutulmuş xidmətlər
göstəriləcək.
“Bu müayinələr mammoqrafiya, lazım gələn halda ultrasəs
müayinəsini, biopsiya və sitoloji müayinələri nəzərdə tutur.
Proqramda 40 yaşdan 70 yaşa qədər qadınlar iştirak edə bilər. Belə
tədbirlər ona görə keçirilir ki, adamlar üçün coğrafi baxımdan
əlçatan olsun. Evə yaxın yerdə belə müayinədən keçsinlər və sonra
hansısa patologiya qeydə alınarsa, erkən mərhələdə aşkarlansın,
xəstəlik daha asan müalicə edilsin”, – Eter Kiğuridze
bildirdi.
Marneuli “Geo Hospitals” Doğum Evi və Ambulatoriya Mərkəzinin
rəhbəri Nino Koberidze “Marneuli” radiosu ilə söhbəti zamanı
bildirdi ki, tibb mərkəzi və Milli Skrininq Mərkəzinin əməkdaşlığı
ilə müayinələr iki gün davam etdiriləcək.
“Bu gün və sabah, yəni 14-15 iyun tarixlərində bizdə süd vəzisi
xərçənginin skrininq müayinələri pulsuz olacaq. Düşünürük ki, bu
çox mühümdür. Çünki problem ağırlaşmamış müayinə
aparılır.”
Nino Koberidzenin sözlərinə görə, aksiya təhlükəsiz mühitdə
aparılır və koronavirusla bağlı bütün tövsiyələrə riayət
edilir.
Marneuli merinin müavini Kənan Ömərov xəstəliklərin skrininq
proqramı çərçivəsində Marneulidə pulsuz müayinələrin aparılması
prosesini nəzərdən keçirib. O, proqramı müsbət qiymətləndirib və
tibb müəssisəsinin nümayəndələrinə minnətdarlığını bildirib.