Marneulidə fiziki imkanları məhdud şəxslərin məsələləri üzrə
işləyən şura dörd şəxsin ərizəsini müzakirə edəcək. Həmin şəxslər
yaşayış evlərinin adaptasiyasını tələb edirlər.
Marneulidə Fiziki İmkanları Məhdud Şəxslər Şurasının iclası 30 iyun
tarixində baş tutub. Meriya tərəfindən yayımlanmış məlumata əsasən,
Marneuli bələdiyyəsində fiziki imkanları məhdud şəxslərin
məsələləri üzrə işləyən şuranın təqvim ilinin ikinci iclası
keçirilib.
Marneuli merinin yeni müavini Roin Dekanoidze fiziki imkanları
məhdud şəxslərin iclasında ilk dəfə iştirak edirdi. Dekanoidze
“Marneuli” radiosu ilə söhbəti zamanı bildirdi ki, ilk iclasda
şuranın fəaliyyəti və üzvlük funksiyası ilə tanış olub.
“Konkret ərizələri müzakirə etdik. Şura üzvlərinə
tapşırıq verdim ki, benefisiarların hansı yardıma ehtiyac
duyduqlarını gedib yerindəcə öyrənsinlər. Büdcədə müəyyən qədər pul
nəzərdə tutulub və həmin məbləğ çərçivəsində onlara yardım
edəcəyik. Bəzisi yaşayış evində otaq qurmaq, bəzisi pandus
düzəltdirmək istəyir. İkinci mərtəbədə yaşayan benefisiarlarımız
var və aşağı enmək üçün pandusa ehtiyacları var. Ərizələri
yerindəcə araşdırdıqdan sonra nəyə ehtiyacları varsa, yardım
edəcəyik”, – Roin Dekanoidze bildirdi.
Marneuli merinin müavininin sözlərinə görə, “bələdçi institutu”-nun
yaradılması ilə bağlı iş prosesi davam edir. O, bildirdi ki,
Marneuli bələdiyyəsində neçə nəfər görmə qüsurlu şəxsin və xidmətin
tam fəaliyyət göstərməsi üçün neçə nəfərə ehtiyac olduğunu
aydınlaşdırmaq üçün araşdırma aparılır. Bələdçi xidməti vasitəsilə
bələdiyyədə yaşayan görmə qüsurlular bələdçinin yardımı ilə
müxtəlif dövlət, yaxud özəl qurumlara gedə, onlara lazım olan
xidmətlərdən yararlana biləcəklər.
Qeyd edək ki, Marneuli Fiziki İmkanları Məhdud Şəxslər Şurasının
sədri Marneuli merinin keçmiş müavini Laşa Lobcanidze idi.
Lobcanidzeni bu vəzifədə Roin Dekanoidze əvəz etdi və fiziki
imkanları məhdud şəxslər şurasının sədri oldu.