Marneuli bələdiyyəsinin Saimerlo kəndində artıq iki gündür əhalinin
bir qisminə içməli su verilmir.
Saimerlo sakinləri “Marneuli” radiosu ilə söhbətləri zamanı
bildirdilər ki, suyun nə zaman bərpa olunacağı barədə məlumatları
yoxdur. İsti yay günlərində içməli suyun olmaması isə onlar üçün
xüsusilə problemdir.
Gürcüstan Birləşmiş Su Təchizatı Şirkətinin qaynar xəttindən
“Marneuli” radiosuna bildirdilər ki, kənddə içməli su probleminin
olması ilə bağlı məlumatları yoxdur. Onların sözlərinə görə, əsas
mənbədə çatışmazlıq var və bərpa işləri aparılır.
“Bu gün səhərdən əsas mənbədə təmir işlərinə başlayıblar. Turbin
sıradan çıxıb, mühərrik də təmir edilməlidir. Güman ki, günün
ikinci yarısında kəndə suyun verilməsi bərpa
olunacaq”, – şirkətdən bildirdilər.
Saimerlo kənd sakinləri bildirirlər ki, son dövrdə su tez-tez
məhdudiyyətlə verilir və bu ilk hal deyil.