Marneuli yerli özünüidarəsi 3 il əvvəl 256 000 avroya tikilmiş uşaq bağçasını 175 323 lariyə təmir etməyi planlaşdırır.

Yağlıca küçəsindəki bağçanın tikintisi 2022-ci ildə başa çatdırılıb. Məktəbqdər təhsil müəssisəsinin tikintisi Gürcüstanın İşğal Olunmuş Ərazilərindən olan Məcburi Köçkünlər Əmək, Səhiyyə və Sosial Müdafiə Nazirliyi tərəfindən “Məcburi köçkünlərin və ev sahibi olan icmalar üçün mənzill təminat və sosial infrastrukturda iqtisadi iştirak” layihəsi çərçivəsində həyata keçirilib. Layihə Almaniya İnkişaf Bankının (KFW) maliyyə dəstəyi ilə Danimarka Qaçqınlar Şurası tərəfindən həyata keçirilib.

Uşaq bağçasının tikintisinə baxmayaraq, Yağlıc qəsəbəsindəki məktəbəqədər təhsil müəssisəsi açılmayıb və bina bu günə kimi bağlıdır.

Aprelin 17-də Marneuli meriyası tender elan edib və ona əsasən yerli özünüidarə yuxarıda adı çəkilən uşaq bağçası binasını bərpa etməyi planlaşdırır. Tenderə əsasən, meriya bağçanın bərpası üçün əlavə olaraq 175 323 lari xərcləməyi planlaşdırır.

Qeyd edək ki, Marneuli meriyası 2024-cü ilin noyabr ayında Yağlıca küçəsində yerləşən uşaq bağçasının bərpası üçün zəruri olan layihə və smeta sənədlərini 8071 lariyə alıb.

2024-cü ilin sentyabrında yerli özünüidarə həmin bağçanın həyətinin abadlaşdırılması üçün 124 799 lari ödəyib.

Yağlıca qəsəbəsindəki uşaq bağçası 100 uşaq üçün nəzərdə tutulub.