Mayın 8-də saat 16:30-da Bolnisi Rayon Məhkəməsində seçkini saxtalaşdırmaqda ittiham olunan Rövşən və Etibar İsgəndərovların növbəti məhkəmə iclası keçiriləcək.

İsgəndərovlar ailəsinin sonuncu məhkəmə prosesi aprelin 17-də baş tutub. Həmin iclas zamanı dövlət ittihamçısı Tornike Kapanadze məhkəməyə qapalı rejimdə keçirilməsi ilə bağlı vəsatət təqdim edib. O bildirib ki, iclasda 69 saylı seçki məntəqəsinin seçici qeydiyyat kitabçaları və digər şəxsi məlumatlar, o cümlədən şəxsi identifikasiya nömrələri müzakirə olunacaq.

Prokuror həmçinin məhkəmə zamanı iş üzrə müstəntiqin dindirilməsinin planlaşdırıldığını və bunun da istintaq təfərrüatlarının açıqlanması ilə nəticələnəcəyini əsas gətirib. Hakim Vladimir Tsitlauri bu əsaslarla vəsatəti təmin edib və iclası bağlayıb.

Qeyd edək ki, Rövşən İsgəndərov əvvəllər Marneuli Bələdiyyə Məclisinin sədr müavini vəzifəsində çalışıb. İttiham tərəfinin məlumatına görə, o və Etibar İsgəndərov 2024-cü il oktyabrın 26-da Sadaxlı kəndində yerləşən 69 saylı seçki məntəqəsində seçkiləri saxtalaşdırmağa cəhd ediblər. Sosial şəbəkələrdə yayımlanan videomaterialda Rövşən İsgəndərovun seçki zərflərini qutuya atdığı, Etibar İsgəndərovun isə ona kömək etdiyi görüntülənib.

Hər iki şəxs oktyabrın 31-də saxlanılıb və onların barəsində həbs qətimkan tədbiri seçilib.

Onlar Gürcüstan Cinayət Məcəlləsinin 164-cü maddəsi – seçki ilə bağlı sənədlərin (seçici siyahıları, protokollar, bülletenlər, qeydiyyat jurnalları və nəzarət vərəqləri) saxtalaşdırılması maddəsi ilə ittiham olunurlar.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---