Azərbaycan Respublikasının Prezidenti İlham Əliyev aprelin 25-də Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallası qəbul edib.

Görüş zamanı Kaya Kallas bildirib ki, Avropa İttifaqı Azərbaycanla əməkdaşlığa yüksək önəm verir və bu əlaqələrin daha da genişləndirilməsində maraqlıdır. O, enerji sahəsindəki tərəfdaşlığı xüsusi vurğulayaraq qeyd edib ki, Azərbaycan Avropanın enerji təhlükəsizliyində vacib və etibarlı tərəfdaş kimi çıxış edir.

Avropa rəsmisi həmçinin Azərbaycanın nəqliyyat sahəsindəki regional rolu və geosiyasi əhəmiyyətinə toxunub. Onun sözlərinə görə, Azərbaycan həm region daxilində, həm də daha geniş coğrafiyada strateji əhəmiyyətə malik ölkədir.

Prezident İlham Əliyev öz növbəsində vurğulayıb ki, Azərbaycan artıq Avropa İttifaqının 8 üzvü də daxil olmaqla Avropanın 10 ölkəsinə qaz ixrac edir. O, Cənub Qaz Dəhlizinin fəaliyyətə başlamasından 4 il keçdiyini və bu müddət ərzində Avropanın qaz təchizatında mühüm rol oynadığını qeyd edib.

Dövlət başçısı əlavə edib ki, Azərbaycanın Avropa İttifaqı ilə Cənub Qaz Dəhlizi Məşvərət Şurası çərçivəsində uğurlu dialoqu var və tərəflər arasında bərpaolunan enerji sahəsində də əməkdaşlıq üçün geniş potensial mövcuddur. Xüsusilə, Xəzər dənizinin Azərbaycan sektorundakı külək enerjisi ehtiyatlarının bu istiqamətdə yeni imkanlar yaratdığını bildirib.

Prezident İlham Əliyev qeyd edib ki, Azərbaycan Mərkəzi Asiya ölkələri ilə birlikdə Transxəzər bərpaolunan enerji dəhlizinin inkişafında, eləcə də Gürcüstan, Rumıniya, Macarıstan və Bolqarıstanın qoşulduğu Qara dəniz istiqamətli layihələrin həyata keçirilməsində fəal rol oynayır.

Görüşdə, həmçinin Cənubi Qafqaz regionunda sülh və sabitliyin təmin olunması məsələləri də müzakirə edilib. İlham Əliyev bildirib ki, Ermənistanla münasibətlərin normallaşdırılması istiqamətində ikitərəfli əsasda danışıqlar aparılır.

Tərəflər görüş zamanı qarşılıqlı maraq doğuran digər məsələlərlə bağlı da fikir mübadiləsi aparıblar.