საქართველოს სახელმწიფო უსაფრთხოების სამსახურმა დიდი ოდენობით თაღლითობის მცდელობის ფაქტზე მარნეულის მერიის თანამშრომელი და მასთან დაკავშირებული პირი დააკავა.

ჩამატება: სუს-ში რადიო "მარნეულს" განუცხადეს, რომ რიმა ოთარაშვილი არ დაუკავებიათ, ის განაჩენს არასაპატიმრო აღკვეთი ღონისძიების პირობებში დაელოდება.

დღეს, 9 მარტს, სუს-ის მიერ გავრცელებული ინფორმაციის მიხედვით, მარნეულის მუნიციპალიტეტის მერიის ადმინისტრაციული სამსახურის თანამშრომელი და ერთი მოქალაქე დააკავეს.

„გამოძიებით დადგინდა, რომ მარნეულის მუნიციპალიტეტში მდებარე

20 000 კვ.მ მიწის ნაკვეთის რამდენიმე ნაწილად დაყოფ-გამიჯვნის საკითხის თითქოსდა მარნეულის მუნიციპალიტეტის მერიაში დადებითად გადაწყვეტის სანაცვლოდ მერიის ადმინისტრაციული სამსახურის თანამშრომელმა და მისმა ნდობით აღჭურვილმა პირმა მოქალაქისგან მოითხოვეს 60 000 აშშ დოლარი, საედანაც წინასწარ აიღეს 5 000 აშშ დოლარი“. - აღნიშნულია სუს-ის განცხადებაში

სახელმწიფო უსაფრთხოების სამსახურის მიერ გავრცელებულ კადრებში ჩანს, თუ როგორ იღებს თანხას მარნეულის მერიის ადმინისტრაციული სამსახურის თანამშრომელი რიმა ოთარაშვილი და მოქალაქეს 60 000 დოლარად სთავაზობს საქმის 100%-იან მოგვარებას და აცხადებს, რომ „ამ საქმის მთავარი ფიგურა იქნება მერი“.

გამოძიება სისხლის სამართლის კოდექსის 19, 180-ე მუხლის მეორე ნაწილის ა). და მესამე ნაწილის ბ). ქვეპუნქტებით მიმდინარეობს, რაც სასჯელის სახით 6-დან 9 წლამდე ვადით თავისუფლების აღკვეთას ითვალისწინებს.