მარნეული-თბილისის გზის კუმისის მონაკვეთზე ავტოსაგზაო შემთხვევა მოხდა. ავარია 10 სექტემბერს, დაახლოებით 13:00 საათზე მოხდა. შემთხვევის შედეგად მსუბუქი ავტომობილი და მოტოციკლი ერთმანეთს შეეჯახნენ, მოტოციკლის მძღოლი კი დაშავდა.

შემთხვევის თვითმხილველების ინფორმაციით, დაშავებული სასწრაფო სამედიცინო დახმარების ბრიგადამ საავადმყოფოში გადაიყვანა.

შემთხვევის ადგილზე პოლიციისა და სახანძრო-სამაშველო ბრიგადის მობილიზება მოხდა.

საქართველოს შინაგან საქმეთა სამინისტროში „მარნეულის“ რადიოს განუცხადეს, რომ მომხდარ ფაქტზე გამოძიება საქართველოს სისხლის სამართლის კოდექსის 276-ე მუხლით დაიწყო. აღნიშნული მუხლი სატრანსპორტო საშუალების მოძრაობის უსაფრთხოების ან ექსპლუატაციის წესების დარღვევას ითვალისწინებს.