Polis Marneuli bələdiyyəsinin Kürtlər kəndində fövqəladə rejimi
pozduğuna görə bir gündə üç nəfəri 3000 lari cərimələyib.
Daxili İşlər Nazirliyindən indiki mərhələdə Marneulidə neçə və
hansı qayda pozuntusu qeydə alındığını konkret qeyd etmirlər.
Polisin hansı hallarda cərimə yaza biləcəyi halların siyahısını
təqdim edirik.
Vətəndaşın evdən çıxmasına icazə verilir:
- Qida məhsulları almaq məqsədi ilə;
- Dərman almaq məqsədi ilə;
- Həkimə getmək məqsədi ilə;
- Heyvanlara yem almaq məqsədi ilə;
- Kənd təsərrüfatı işləri həyata keçirmək məqsədi
ilə.
Qeyd olunan hallardan başqa Gürcüstan Daxili İşlər Nazirliyi
inzibati qayda pozuntusu üçün fiziki şəxslərə 3000 lari, hüquqi
şəxslərə isə 15 000 lari cərimə yaza bilər. Eyni hərəkətin təkrar
edilməsi cinayət məsuliyyətinə cəlb olunmağa səbəb olur. Eləcə də
hökumətin 181 saylı sərəncamına əsasən, ictimai məkanlarda 10
nəfərdən artıq adamın toplaşması, 10 nəfərdən artıq adamın
toplaşacağı sosial tədbirlər qadağandır. Bu toy, yas mərasimləri və
başqa tədbirlər də ola bilər.
Gürcüstan miqyasında 29 mart tarixində son 24 saata olan məlumata
görə, 125 fövqəladə vəziyyətlə rejiminin pozulması halı qeydə
alınıb. Gürcüstan miqyasında 96 nəfər vətəndaş ictimai məkanda 10
nəfərdən artıq şəxsin toplaşmasına, 3 hüquqi şəxs, 8 fiziki şəxs
ticari fəaliyyətlə bağlı məhdudiyyətləri pozduğuna, 5 nəfər
mikroavtobusla şəhərlərarası sərnişindaşıma faktına, 14 nəfər isə
özünütəcrid və karantin qaydalarını pozduğuna görə cərimələnib.
23 mart tarixində Marneuli və Bolnisi bələdiyylərində ciddi
karantin rejimi tətbiq olunub. Hökumət bu qərarı Marneulili qadının
koronavirusa yoluxmasından sonra verib. Marneuli və Bolnisi
bələdiyyələrində müəyyən məhdudiyyətlər tətbiq olunub:
- Marneuli və Bolnisi bələdiyyələrinə giriş və çıxış
məhdudlaşdırılır.
- Yalnız qida məhsulları, dərman və kritik
infrastrukturla bağlı başqa obyektlər əlçatan olacaq. İctimai
nəqliyyatın hərəkəti dayandırılır.
- Marneuli və Bolnisi sakinlərinə tibb işçiləri
tərəfindən yazılmış protokola uyğun olaraq kənd təsərrüfatı işləri
aparmağa icazə veriləcək.
Qeyd edək ki, 21 aprelə qədər ölkə miqyasında fövqəladə vəziyyət
elan olunub.