Distant rejimə keçən Xuldərə məktəbinin şagirdləri dərsə qoşulmaqda
çətinlik çəkirlər.
Bildiyimiz kimi, son günlərdə koronavirusun yayılmasının qarşısının
alınması üçün məktəblər də distant rejimə keçib.
Ancaq, distant rejimə keçən Xuldərə məktəbinin şagirdləri onlayn
dərsə qoşulmaqda çətinlik çəkirlər. Bunun səbəbi isə kənddə
internet xəttinin olmamasıdır.
Kəndin məktəb şagirdlərinin sözlərinə görə, onlar dərslərə mobil
internet vasitəsi ilə qoşulurlar.
“Bizdə şəbəkə tutur mobil internetimiz var, amma kənddə
internet yoxdur. Öz mobil internetimlə dərslərə qoşuluram, bunun
üçün hər ay 19 lari ödəyərək internet paketimi yeniləməli oluram.
Bir çox uşaqlar isə ümumiyyətlə dərslərə qoşula
bilmirlər”, – 10-cu sinif şagirdi deyir.
Şagirdlərin sözlərinə görə, onlar bəzən məcbur qalaraq qonşu
Sadaxlı kəndinə gedir və orada interneti olan yaxınlarının
evlərində dərsə qoşula bilirlər. Bu vəziyyət şagirdlərin
valideynlərini də narahat edir.
“Mənim üç məktəbli övladım var və onlar aşağı
siniflərdə oxuyurlar. Onlar da dərslərə qoşulmaqda çətinlik
çəkirlər. Evdə üç kompüterləri var, ancaq mənim telefonum hər üç
kompüterə WiFi paylaya bilmir çox zəif olur. Kəndə internet
çəkilmədiyinə görə bəzən Sadaxlıya, yaxınlarımın evlərinə aparmalı
oluram”,– kənd sakini deyir.
Xuldərə ictimai məktəbinin direktoru Mahmud Məmmədov deyir ki,
distant rejimdə dərs keçmək üçün 26 müəllim qeydiyyatdan keçib və
ümumilikdə 150 nəfər uşağa dərs keçməlidirlər. Lakin internet
olmadığına görə 20 nəfər şagirdi olan sinifdən cəmi 4-5 şagird
dərslərə qoşula bilirlər.
Müəllif: Aysun Şəpərəyeva