25 წლის ფერიდ აბასოვი მარნეულის რაიონის სოფელ ქვემო სარალში ცხოვრობს, მას სასწრაფოდ სჭირდება ოპერაციის გაკეთება, მაგრამ მარნეულის საკარანტინე ზონად გამოცხადების გამო თბილისში ვერ მიდის.

ფერიდმა მუცლის ღრუს არეში დაზიანება სიმინდის დაფქვის დროს მიიღო. თავდაპირველად თბვილისში „არამიანცის“ საავადმყოში გადაიყვანეს და იქ გაუკეთეს ოპერაცია. პირველი ოპერაციის შემდეგ ფერიდს პლასტიკური ოპერაციის გაკეთება დასჭირდა. გარკვეული პერიოდის გასვლის შემდგომ თბილისში „ავერსის“ კლინიკაში ოპერაცია გაუკეთეს, მაგრამ როგორც ამბობს, უშედეგოდ.

„სახლში რომ წამოვედი ჭრილობაში ინფექცია მოხდა. ექიმს დავუკავშირდი. მან თქვა, რომ აუცილებლად უნდა წავიდე კლინიკაში, მაგრამ მარნეულში კარანტინი რომაა გამოცხადებული ვერ მივდივარ. ცუდად გავხდი და სასწრაფო გამოვიძახეთ, მარნეულში ავერსის კლინიკაში წამიყვანეს“ - ამბობს ფერიდ აბასოვი

ფერიდმა ჩვენთან საუბრისას მარნეულის საავადმყოფოში ყოფნის პერიოდი გაიხსენა.

„მე მარნეულში წავედი. ჩემი ექიმი იქ ჩამოვიდა და პირველადი დახმარება გამიწია. მითხრა, სასწრაფოდ ოპერაცია გჭირდებაო, მაგრამ კარანტინის გამო მე თბილისში ვერ წავედი. იქ ექიმმა მითხრა, რომ ყოველდღიურად მარნეულში უნდა ჩამოხვიდეო და აქ უნდა გამოგიცვალონ სახვევებიო. 10 დღე იქ ვიარე. ავტომობილების მოძრაობა რომ შეიზღუდა ვეღარ წავედი. იძლებული გავხდი სახლში სახვევები თვითონ შემეცვალა. ეს ჩემთვის დიდი რისკია. იმიტომ, რომ ჭრილობა ღიაა და პატარა შეცდომის შედეგად ინფექცია შეიძლება მოხვდეს. ამიტომ სასწრაფოდ უნდა გამიკეთონ ოპერაცია“ - გვეუბნება ფერიდ აბასოვი

ფერიდმა გვითხრა, რომ მარნეულის მუნიციპალიტეტის მერიის წარმომადგენელს დახმარების სათხოვნელად მიმართა, მაგრამ მისგან მანქანით გადაადგილებაზე ნებართვის აღებაზე უარი მიიღო. მას შემდეგ მერიისათვის აღარ მიუმართავს.

რადიო „მარნეულთან“ საუბრისას მარნეულის მერიის ჯანდაცვის, სოციალური უზრუნველყოფის, კულტურისა და სპორტის სამსახურის უფროსმა გიორგი მეურმიშვილმა განაცხადა, რომ მოქალაქეს, ოპერაციის გასაკეთებლად, მარნეულიდან თბილისში მხოლოდ იმ შემთხვევაში აქვს გასვლის უფლება, თუ მისი მდგომარეობიდან გამომდინარე ოპერაცია გადაუდებელია და მას მარნეულის კლინიკაში ვერ ჩაატარებენ.

მეურმიშვილის განცხადებით, პაციენტის „ავერსის“ კლინიკაში მოთავსების დროს, თუ საავადმყოფოში საჭირო დახმარებას ვერ აღმოუჩენე, თავად კლინიკაა ვალდებული, რომ პაციენტს მისცეს შესაბამისი ცნობა და თბილისის რომელიმე კლინიკაში გადაამისამართოს.