აზერბაიჯანის თავდაცვის სამინისტრო ქვეყნის კუთვნილი უპილოტო საფრენი
აპარატის ჩამოგდების შესახებ ინფორმაციას არ ადასტურებს, - ამის
შესახებ ინფორმაციას აზერბაიჯანული საინფორმაციო სააგენო APA
ავრცელებს.
„ვაცხადებთ, რომ ეს ინფორმაცია სიმართლეს არ შეესაბამება.
აზერბაიჯანის არმიის კუთვნილი ყველა უპილოტო საფრენი აპარატი ადგილზეა
და დანაკარგი არ გვაქვს,“- აღნიშნულია თავდაცვის
სამინისტროს განცხადებაში.
შეგახსენებთ, გუშინ აზერბაიჯანი-სომხეთის საზღვრზე სომეხ და
აზერბაიჯანელ სამხედროებს შორის დაპირისპირება მოხდა, რის შედეგადაც,
მედიის ინფორმაციით, დაიღუპა 3 და დაშავდა 5 აზერბაიჯანელი ჯარისკაცი.
მხარეები ცეცხლის გახსნაში ერთმანეთს ადანაშაულებენ.
შეტაკებები გვიან ღამითაც გაგრძელდა. აზერბაიჯანის თავდაცვის
სამინისტროს ინფორმაციით, სომხეთის შეიარაღებულმა ძალებმა თოუზის
რაიონის სოფელი აღდამის მიმართულებით 120 მმ-იანი ნაღმტყორცნების
გამოყენებით ცეცხლი გახსნეს, აზერბაიჯანელი ჯარისკაცები კი „მტრის
პროვოკაციის საპასუხოდ ძლიერ ზომებს იღებდნენ.“ სომხეთის თავდაცვის
სამინისტრომ აზერბაიჯანული დასახლებების მიმართულებით ცეცხლის გახსნის
შესახებ ინფორმაცია უარყო.