დღეს, 16 აპრილს, მარნეულის მუნიციპალიტეტის საკრებულომ მარნეულის მერიას მისცა თანხმობა განახორციელოს 5 159 826 ლარისა და 5 640 394 ლარის ღირებულების ორი პროექტი. მარნეულის საკრებულოზე სიტყვით გამოსვლისას მარნეულის მერიის საფინანსო-საბიუჯეტო სამსახურის ხელმძღვანელმა კობა ჩხიტუნიძემ განაცხადა, რომ აღნიშნული პროექტების ღირებულება აღემატება მარნეულის მუნიციპალიტეტის გადასახადების 5%-ს რის გამოც მერიას პროექტების განსახორციელებლად საკრებულოს თანხმობა დასჭირდა.

„გადასახადების 5%, თანხაში გამოხატული ფორმულირებით, ჯამში

შეადგენს 4 306 677 ლარს, რომლის გათვალისწინებითაც 5%-ს, ანუ ამ აღნიშნულ თანხას აჭარბებს ორი პროექტის ღირებულება. საკრებულოს სხდომაზე თანხმობის მიღების მიზნით წარმოგიდგენთ სწორედ ამ ორ პროექტს“. - განაცხადა კობა ჩხიტუნიძემ

მარნეულის მუნიციპალიტეტის ადგილობრივი თვითმმართველობა 5 640 394 ლარად გეგმავს სოფელ თამარისის მისასვლელი გზის სარებაილიტაციო სამუშაოების შესყიდვას, ხოლო 5 159 826 ლარად აპირებს სოფელ წერეთლის შიდა გზების სარეაბილიტაციო სამუშაოების მეორე ეტაპის შესყიდვას.

საკრებულოს სხდომაზე განსახილველად სულ 4 საკითხი იყო გამოტანილი. დეპუტატებმა ოთხივე საკითხთან დაკავშირებით დადებითი გადაწყვეტილება მიიღეს.


რადიო "მარნეული"