პლატფორმა „სალამი“ საქართველოს კრიზისულ მდგომარეობაზე განცხადებას ავრცელებს. მათი თქმით, სახელმწიფო ინსტიტუტები ქვეყანაში ჩამოშლილია და ვერც ერთი ორგანო ვერ პასუხობს ხალხის მოთხოვნებს.

„სახელმწიფო ინსტიტუტები ჩამოშლილია“ – აღნიშნულია განცხადებაში. „ხალხი არ აღიარებს უკანასკნელ არჩევნებსა და მოქმედ ხელისუფლებას. საერთაშორისო აქტორები საქართველოსგან მოითხოვენ ახალი არჩევნების დანიშვნასა და პოლიტპატიმრების გათავისუფლებას.“

მათი თქმით, ევროპის ასამბლეამ უკვე მიიღო რეზოლუცია, ხოლო არაერთმა ქვეყანამ დაასანქცირა სხვადასხვა თანამდებობის პირები.

"საქართველო ხდება იზოლაციის ნაწილი"
პლატფორმის განცხადების მიხედვით, საქართველო ყოველდღიურად პოლიტიკური იზოლაციისკენ მიექანება და ძალადობრივ მმართველობას ითვისებს. ეს, მათივე თქმით, რეპრესიული პოლიტიკის შედეგია, რომელიც მშვიდობიან მოქალაქეებზე ძალადობაში გამოიხატება.

"დაპატიმრებული აქტივისტები თავისუფლებისთვის იბრძვიან"

„დემოკრატიისა და თავისუფლებისთვის ქვეყანაში არნახული ბრძოლა მიმდინარეობს,“ – ნათქვამია განცხადებაში.

ამ პროცესებში უკანონოდ დაპატიმრეს პროტესტის მონაწილეები, რომელთა შორის არის „ბათუმელების“/„ნეთგაზეთის“ დირექტორი, მზია ამოღლობელი, რომელიც უკვე 19 დღეა შიმშილობს.

„მზიას გაჩუმება ნიშნავს ხალხის გაჩუმებას“
პლატფორმა მზია ამოღლობელის პროტესტს სოლიდარობას უცხადებს.

„მისი სიცოცხლე და ჯანმრთელობა რეალურ საფრთხეშია. მისი გაჩუმება არა მხოლოდ მისი პირადი პრობლემა, არამედ მთელი საზოგადოებისთვის საფრთხეს წარმოადგენს. სიტყვისა და გამოხატვის თავისუფლების შეზღუდვა დაუშვებელია,“ – აცხადებენ პლატფორმაში.

პროტესტი რეგიონებშიც იწყება
პლატფორმის ინფორმაციით, პროტესტი თბილისს აღარ შემოიფარგლება და რეგიონებში ვრცელდება.

„გუშინ დმანისში სამოქალაქო აქტივისტმა და 'შეხვედრის ადგილის' დამფუძნებელმა ლაშა ჩხვიმიანმა მიმდინარე პროცესების მიმართ პროტესტის ნიშნად შიმშილობა დაიწყო,“ – ნათქვამია განცხადებაში.

პლატფორმის პოზიცია
„ხალხი არ არის მხოლოდ ფორმალურად ხელისუფლების წყარო. ჩვენ გავიმარჯვებთ სამართლიან ბრძოლაში!“

თავისუფლება პოლიტპატიმრებს!
თავისუფლება მზია ამოღლობელს!
სოლიდარობა ლაშა ჩხვიმიანს! - – აცხადებენ პლატფორმის წარმომადგენლები.