6 ნოემბერს, პატიმრობაში მყოფ ქართველ ჟურნალისტს, სახაროვის პრემიის მფლობელ მზია ამაღლობელს, კიდევ ერთი ჯილდო გადაეცა - „თავისუფალი მედიის ჯილდო“ (Free Media Award).

დაჯილდოების ცერემონია 6 ნოემბერს საღამოს გაიმართა გერმანიის ქალაქ ჰამბურგში.

პატიმრობაში მყოფი ამაღლობელის ნაცვლად ჯილდო მიიღეს მისმა კოლეგებმა და მეგობრებმა, „ნეტგაზეთისა“ და „ბათუმელების“ მთავარმა რედაქტორებმა ნესტან ცეცხლაძემ და ეთერ თურაძემ.

პრემია Free Media Awards-ი ორი ევროპული ფონდის, ნორვეგიული The Fritt Ord Foundation-ისა და გერმანული The Zeit Stiftung Bucerius-ის მიერ არის ინიციირებული.

ჯილდო ყოველწლიურად გადაეცემა აღმოსავლეთ და ცენტრალური ევროპის ქვეყნებში მომუშავე მედიაგამოცემებს ან ჟურნალისტებს, რომლებიც განსაკუთრებულ როლს თამაშობენ დამოუკიდებელი მედიისა და სიტყვის თავისუფლების დაცვაში.

Fritt Ord Foundation-ისა და ZEIT Stiftung Bucerius-ის მიერ გავრცელებულ პრესრელიზში ნათქვამია, რომ მზია ამაღლობელი, რომელიც ჯილდოვდება ჟურნალისტური ეთიკისა და სიმართლის მიმართ 25-წლიანი ერთგულებისთვის, დამოუკიდებელი ჟურნალისტიკის სახე გახდა საქართველოში.

ამ ჯილდოს მფლობელი უკვე იყო მის მიერ დაფუძნებულ ორივე გამოცემა - „ბათუმელები“ და „ნეტგაზეთი“.

22 ოქტომბერს მზია ამაღლობელს გადაეცა სახაროვის პრემია, - ევროკავშირის ადამიანის უფლებათა უმაღლესი ჯილდო.