მთლიან შიდა პროდუქტში სოფლის მეურნეობის წილი წლიდან წლამდე მცირდება, - ამას აჩვენებს სტატისტიკის ეროვნული სამსახურის მონაცემები.

2024 წლის წინასწარი მონაცემებით, მშპ-ში სოფლის მეურნეობის წილი 6.2%-ს შეადგენდა, რაც 15-წლიან მინიმუმზე მიუთითებს. ცნობისთვის, საქსტატზე მონაცემები 2010 წლიდან არის ხელმისაწვდომი.

აღსანიშნავია, რომ 2010-2024 წლებში სოფლის მეურნეობას ყველაზე მაღალი წილი მთლიან შიდა პროდუქტში 2011 წელს ჰქონდა და 11%-ი შეადგინა.

როგორია ბოლო 15 წელში საქართველოს მშპ-ში სოფლის მეურნეობის წილი:



აღსანიშნავია, რომ ბოლო მონაცემებით, მეზობელ ქვეყნებს შორის, მშპ-ში სოფლის მეურნეობის წილი ყველაზე დაბალი რუსეთში, ყველაზე მაღალი კი სომხეთში.

სომხეთში მშპ-ში სოფლის მეურნეობის წილი 2024 წელს 8.4% იყო, წინა წელს კი 8.9%. მას მოსდევს თურქეთი 7.2%-იანი წილით (2023-ში 6.6%), მესამე ადგილზე აზერბაიჯანია, სადაც სოფლის მეურნეობის წილი მთლიან შიდა პროდუქტში 2024 წელს 6.3%-ს შეადგენდა (2023 წელს - 6.1). რაც შეეხება რუსეთს, გასულ წელს მშპ-ში სოფლის მეურნეობის წილი მხოლოდ 2.7% იყო (2023 წელს 3%).