აშშ-ის კონგრესის წარმომადგენლები (სენატორ როჯერ უიკერის, კონგრესმენ ჯონ უილსონის, სენატორ შელდონ უაიტჰაუსის და კონგრესმენ სტივ კოენის სახელით) „ჰელსინკის კომისიის“ განცხადებით, მოითხოვენ საქართველოს ხელისუფლებამ მშვიდობიანი დემონსტრანტების წინააღმდეგ ქიმიური ნივთიერების (BBC-ის გამოძიებით - პირველი მსოფლიო ომის დროინდელი ნივთიერება) გამოყენების შესახებ გავრცელებული ცნობების სასწრაფო შემოწმებას.

კომისიის შეფასება და მოთხოვნა

„ჰელსინკის კომისია“ მონაცემებს „ღრმად შემაშფოთებელს“ უწოდებს და აცხადებს, რომ „ამ ქიმიურმა თავდასხმებმა“ მსხვერპლთა შორის გამოიწვია დამწვრობები და ჯანმრთელობის ხანგრძლივი გართულებები, რაც ადამიანის უფლებების დარღვევაა.

კომისიის წარმომადგენლები მოუწოდებენ აშშ-ის მთავრობასა და დემოკრატიულ მოკავშირეებს:

გადაამოწმონ გავრცელებული ცნობები.

დამნაშავე პირებს დაუწესონ შესაბამისი სანქციები.

მიიღონ MEGOBARI აქტი, რომელიც ქართველი ხალხის თავისუფლებისთვის ბრძოლას დაუჭერს მხარს.

კომისია მიიჩნევს, რომ მსგავსი საქციელით „ქართული ოცნების“ ადგილი „რუსეთის და ჩინეთის კორუმპირებული მმართველების ლიგაშია“.

„ქართული ოცნების“ რეაქცია

BBC-ის ჟურნალისტური გამოძიების (გამოქვეყნდა 1 დეკემბერს) საპასუხოდ, „ქართულმა ოცნებამ“ განაცხადა, რომ BBC-ს წინააღმდეგ საერთაშორისო სასამართლოებში სამართლებრივ დავას იწყებს.

ამავდროულად, სახელმწიფო უსაფრთხოების სამსახურმა (სუს) აღძრა სისხლის სამართლის საქმე „სამსახურებრივი უფლებამოსილების გადამეტებისა“ და „უცხოეთის ორგანიზაციისთვის მტრულ საქმიანობაში დახმარების“ მუხლებით. სუს-მა გამოკითხვაზე დაიბარა BBC-ის საგამოძიებო ფილმის რესპონდენტები (ექიმები და სამოქალაქო საზოგადოების წარმომადგენლები).