გარემოსდაცვითი ზედამხედველობის დეპარტამენტის აჭარისა და გურიის რეგიონული სამმართველოს თანამშრომლებმა, უკანონო ტყითსარგებლობასთან ბრძოლის ფარგლებში, სამართალდარღვევები ქობულეთის, ხელვაჩაურისა და შუახევის მუნიციპალიტეტებში გამოავლინეს.

უწყების ინფორმაციით, სოფლებში – ლეღვაში, მუხაესტატეში, ჩიქუნეთში, ბარათაულში, ჟანივრში, ბრილში, ქიძინიძეებსა და გომარდულში, მოქალაქეებმა უკანონოდ მოიპოვეს სხვადასხვა სახეობის ხე-მცენარეები.

ჯამში ამოღებულია უკანონოდ მოპოვებული 57 მრგვალი ხე-ტყე, მათ შორის 52 წიწვოვანი და 5 „წითელი ნუსხით“ დაცული წაბლის სახეობის მორი.

გარემოსდაცვითი ზედამხედველობის დეპარტამენტში აცხადებენ, რომ ბუნებრივი რესურსების დაცვა მათი ერთ-ერთი მთავარი პრიორიტეტია. რეგიონული სამმართველოების თანამშრომლები გარემოსდაცვითი სახელმწიფო კონტროლის განხორციელებისას განსაკუთრებულ ყურადღებას უთმობენ უკანონო ტყითსარგებლობის გამოვლენასა და აღკვეთას.