„ქართული ოცნების“ მთავრობა პარლამენტს მიმართავს საკანონმდებლო ინიციატივით, რომლის მიხედვითაც, სახელმწიფო-პოლიტიკური თანამდებობის პირებს სახელფასო დანამატისა და ფულადი ჯილდოს მიღება შეეძლებათ.

შეიცვლება „საჯარო დაწესებულებაში შრომის ანაზღაურების შესახებ“ კანონის მე-20 მუხლი, რომელშიც ახლა წერია: „სახელმწიფო-პოლიტიკური თანამდებობის პირს და პოლიტიკური თანამდებობის პირს სახელფასო დანამატი არ ეძლევათ“.

ვის შეეძლება ფულადი ჯილდოს მიღება?

• მინისტრის მოადგილეს;
• აფხაზეთისა და აჭარის ავტონომიური რესპუბლიკების მინისტრების მოადგილეებს;
• სახელმწიფო რწმუნებულის მოადგილეებს;
• მერის მოადგილეს.

რა შემთხვევაში წაახალისებენ მაღალჩინოსანს?
კანონპროექტის მიხედვით, მინისტრს, მერსა და გუბერნატორს მოადგილის წახალისება შეეძლება, თუკი დაქვემდებარებული პირი შეასრულებს:

• ზეგანაკვეთურ სამუშაოს ან/და დამატებითი ფუნქციებს;
• მათ შორის, ღამის საათებში, დასვენების/უქმე დღეს და ჯანმრთელობისათვის რისკის შემცველ სამუშაო პირობებში საქმიანობისათვის.
• დანამატი შეიძლება გაიცეს მხოლოდ ზემდგომის გადაწყვეტილებით.

რამდენი შეიძლება იყოს დანამატი?

• სახელფასო დანამატის წესებს ადგენს "საჯარო დაწესებულებაში შრომის ანაზღაურების შესახებ“ კანონის 26-ე მუხლი, რომლის მიხედვითაც:
• დანამატი არ უნდა აღემატებოდეს 1 თვის ხელფასს;
• წლის განმავლობაში ჯამში შეიძლება გაიცეს წლიური ხელფასის 20%.

კანონპროექტი დაჩქარებული სახით არ განიხილება, თუმცა ამოქმედდება გამოქვეყნებისთანავე.