შინაგან საქმეთა სამინისტროს სასაზღვრო პოლიციის ოპერატიულ-საგამოძიებო დეპარტამენტის აღმოსავლეთის საგამოძიებო სამსახურის თანამშრომლებმა საქართველოს სახელმწიფო საზღვრის ჯგუფურად უკანონოდ გადაკვეთის ბრალდებით 3 პირი დააკავეს.

უწყების ინფორმაციით, ჩატარებული ოპერატიული ღონისძიებებისა და საგამოძიებო მოქმედებების შედეგად დადგინდა, რომ დაკავებულმა პირებმა ლაგოდეხის სამმართველოს სექტორ „მაწიმის“ და წითელი ხიდის სამმართველოს სექტორ „ვახტანგისის“ სასაზღვრო-საკონტროლო გამტარი პუნქტების გვერდის ავლით ქვეითად უკანონოდ გადმოკვეთეს საქართველო-აზერბაიჯანის სახელმწიფო საზღვარი და საქართველოში შემოვიდნენ.

გამოძიება საქართველოს სისხლის სამართლის კოდექსის 344-ე მუხლით მიმდინარეობს, რაც ხუთ წლამდე ვადით თავისუფლების აღკვეთას ითვალისწინებს.

უწყების ინფორმაციით, დაკავებული ორი პირის მიმართ გატარდა საემიგრაციო პროცედურები და განხორციელდა მათი ქვეყნიდან გაძევება.