გარემოსდაცვითი ზედამხედველობის დეპარტამენტის მცხეთა-მთიანეთის რეგიონული სამმართველოს თანამშრომლებმა დუშეთის მუნიციპალიტეტში, სოფელ ოძისის მიმდებარედ, მდინარე ქსანზე უკანონო თევზჭერის ფაქტი გამოავლინეს.

ოპერატიული ინფორმაციის საფუძველზე ჩატარებული ინსპექტირებისას დადგინდა, რომ მოქალაქეები თევზს აკრძალული საშუალებით — ელექტროიარაღით იჭერდნენ.

ვინაიდან ელექტროიარაღით თევზჭერა სისხლის სამართლის დანაშაულს წარმოადგენს, შედგენილი მასალები შემდგომი რეაგირებისთვის შესაბამის უწყებას გადაეგზავნა.

უწყებაში განმარტავენ, რომ ელექტროშოკი საფრთხეს უქმნის როგორც წყლის ბიომრავალფეროვნებას, ისე ადამიანის სიცოცხლესა და ჯანმრთელობას. შესაბამისად, მისი დამზადება, შეძენა, შენახვა, ტარება, გადატანა, გადაზიდვა, გადაგზავნა ან გასაღება კანონმდებლობით ისჯება.

ცნობისთვის, მიმდინარე წლის პირველ ექვს თვეში მცხეთა-მთიანეთის რეგიონული სამმართველოს თანამშრომლებმა თევზჭერის წესების დარღვევისა და უკანონო თევზჭერის 50-მდე ფაქტი გამოავლინეს.