გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, უკანონო ტყითსარგებლობასთან ბრძოლის ფარგლებში, 2026 წლის 1 იანვრიდან 31 აგვისტოს ჩათვლით, უკანონო ტყითსარგებლობის 1 124 ფაქტი გამოავლინეს.

დეპარტამენტის ინფორმაციით, გამოვლენილი ფაქტებიდან 136 სისხლის სამართლის დანაშაულის ნიშნებს შეიცავს. შესაბამისი მასალები შემდგომი რეაგირების მიზნით შესაბამის უწყებებში გადაიგზავნა.

გამოვლენილი სამართალდარღვევებიდან 810 ხე-ტყის უკანონო მოპოვებასა და ტრანსპორტირებას უკავშირდება, ხოლო 314 — სახერხი საამქროების მიერ ტექნიკური რეგლამენტის დარღვევისა და არალეგალური საქმიანობის შემთხვევებს.

2026 წლის რვა თვის განმავლობაში დალუქულია 47 არარეგისტრირებული სახერხი საამქრო.

რეგიონების მიხედვით, ყველაზე მეტი — 265 ფაქტი აჭარაში დაფიქსირდა. სამეგრელო-ზემო სვანეთში 204, კახეთში 191, იმერეთში 152, სამცხე-ჯავახეთში 81, ქვემო ქართლში 55, რაჭა-ლეჩხუმი-ქვემო სვანეთში 49, გურიაში 45, შიდა ქართლში 40, მცხეთა-მთიანეთში კი 35 სამართალდარღვევა გამოვლინდა.

დედაქალაქში 7 სამართალდარღვევა დაფიქსირდა. გარემოსდაცვითი პატრულირებისა და სწრაფი რეაგირების თანამშრომლებმა თბილისში რვა თვის განმავლობაში გამოავლინეს 3 უკანონო სახერხი საამქრო, სახერხი საამქროს ტექნიკური რეგლამენტის დარღვევის 3 და ხე-ტყის უკანონო ტრანსპორტირების 1 ფაქტი.

ბუნებრივი რესურსების დაცვა და ტყით უკანონო სარგებლობის პრევენცია, გამოვლენა და აღკვეთა გარემოსდაცვითი ზედამხედველობის დეპარტამენტისთვის პრიორიტეტულია.

დეპარტამენტის ეკიპაჟები ქვეყნის მასშტაბით 24-საათიან რეჟიმში პატრულირებენ. მყისიერი რეაგირება ხდება სამინისტროს ცხელ ხაზზე — 153 — შემოსულ თითოეულ შეტყობინებაზეც.