Ulaşlı kənd sakinləri bu gün, 27 oktyabr tarixində yenidən
aksiya keçirirlər.
Kənd sakinləri kəndin bir neçə məhəlləsinə yol işıqlarının
çəkilməsinə baxmayaraq, əsas məhəlləyə işıqların çəkilmədiyini
deyirlər. Sakinlər deyirlər ki, kəndə ayrılan yardım elə
xərclənməli idi ki, bütün sakinlər bu məbləğlə görülən işin
nəticəsindən razı qalmalı idilər.
Sakinlər həmçinin bildirirlər ki, seçkilərdə “Gürcü Arzusu”-na səs
verilmədiyi halda onların məhəlləsinə işıq çəkilməyəcəyi deyilib.
Onların sözlərinə görə, Marneuli meriyasının Əmlak İdarəsi
Şöbəsinin rəhbəri və Özbaşına Zəbt olunmuş Torpaq Sahələrinin
Leqallaşdırılması Komissiyasının sədri, Ulaşlı kənd sakini Coşqun
Zeynalov həmin məhəlləyə işığın çəkilməyəcəyini bildirib.
“Biz şikayət etdik, gəldilər, dedilər ki, 25 ədəd
plafon alınıb onun yarısı sizindir. Sonradan belə aydın oldu ki,
gəlib çəkiblər. Coşqun Zeynalov sonra gəlib və deyib ki, o
məhəlləyə işıq çəkilməyəcək. Sən hökumət nümayəndəsi olaraq bura
gəlmisən və bilmirsən nə danışırsan. Keçən dəfə də mən qeyd etdim
ki, bu hakimiyyətə də, məmurlara da bomba atmaq lazımdır. Getsin
Ermənistana düşsünlər. Biz o partiyaya səs verməyəcəyik. Nəyə görə
bunu siyasiləşdirirsən?! Vətəndaşın hamısının hüququ eynidir. Hansı
partiyaya səs verirəm, verirəm. Məmurun biri gəlib burada
uşaqlardan soruşub, biz bunu düzəltsək, siz 41-ə səs
verəcəksinizmi?!”, – kənd sakini deyir.
Daha əvvəl Ulaşlı kəndində aksiya keçirilən zaman Qasımlı inzibati
ərazi vahidliyinin deputatı Əşrəf Tükənov “Marneuli” radiosu ilə
söhbətində yaxın gələcəkdə yolların işıqlandırılması üçün işlərin
başlanacağını demişdi. O, işlərin başlaması üçün 3 plafonun lazım
olduğunu söyləmişdi.
Bugün biz Əşrəf Tükənovla yenidən əlaqə saxladıq. O, “Marneuli”
radiosuna müsahibəsi zamanı bildirdi ki, bu gün məhəllənin
işıqlandırılması işlərinə başlanılacaq. O, işin başlaması üçün
hazırda xüsusi briqadanın Ulaşlı kəndində olduğunu bildirdi. Əşrəf
Tükənov sakinlərin “Gürcü Arzusu”na səs verməsələr, işıqlandırma
işlərinin başlamayacağı ilə bağlı sözlərinə də münasibət
bildirdi:
“O onların öz sözüdür. O yalan söhbətdir. Bizim üçün heç bir fərqi
yoxdur, hamı Gürcüstan vətəndaşıdır. Bizim müqəddəs borcumuzdur ki,
sakinlərin qulluğunda duraq. Bu iş bitsin sonra başqa işlər də
tədricən həll olacaq", – Tükənov dedi.
Məsələyə aydınlıq gətirmək üçün Marneuli meriyasının Əmlak İdarəsi
Şöbəsinin rəhbəri və Özbaşına Zəbt olunmuş Torpaq Sahələrinin
Leqallaşdırılması Komissiyasının sədri, Ulaşlı kənd sakini Coşqun
Zeynalov ilə əlaqə saxladıq. O, sakinlərin onun barəsində söylədiyi
fikirlərin yanlış olduğunu və onlara seçkidə "Gürcü Arzusu"-na səs
toplamaları ilə bağlı hər hansı bir söz demədiyini bildirdi.
"Bu çox yanlış bir məlumatdır. Mən orada heç bir kənd sakini ilə
görüşüb, əlaqə saxlamamışam. Küçələrin işıqlandırılması kəndə
ayrılan layihə əsasında oldu. Hansı ki, məbləğ az idi. 41 plafon
idi və 24-ü əlavə olundu və bir küçəyə bəs etdi. Digərinə çatmadı.
Bu yalan bir məlumatdır", – Coşqun Zeynalov
bildirdi.
Xatırladaq ki, Ulaşlı kənd sakinləri 9 oktyabr tarixində aksiya
keçirərək, kəndin yolunun təmirsiz olduğunu və küçə işıqlarının
kəndin bütün küçələrində olmadığını deyirdilər.