Marneuli bələdiyyəsində sərnişinlərin basabas doldurduğu ictimai
nəqliyyat heç kimi təəccübləndirmir.
Ancaq nəqliyyat şirkətlərinə koronavirusun qarşısının alınması
məqsədi ilə tövsiyələrə riayət etmək tapşırığı verildikdən sonra
məsələnin tənzimlənməsi gündəliyə çıxarıldı.
Yeganə vacib tələb maska taxmaqdır. Sərnişinlərin ayaqda durması
qadağandır.
Demək olar ki, pandemiyadan sonra vəziyyət çox da dəyişməyib.
Sürücülər müştəriləri “itirmək” istəmirlər və buna görə də əksər
hallarda oturacaqların sayından artıq sərnişin götürürlər ki, onlar
da ayaq üstə durmalı olurlar. İki metrlik məsafənin saxlanılması
üçün müvafiq işarəedici yazı isə görünüş üçün vurulub. Mövcud
problemlə bağlı bələdiyyədə fəaliyyət göstərən iki nəqliyyat
şirkəti – “Avtopark” MMC-nin direktoru Qiqa Calağonia və “Ekspress
Turist” MMC-nin rəhbəri Yuri Samxaradze ilə əlaqə saxladıq. Onların
hər ikisi dedi ki, onlar üçün maska taxmaq qaydası bu gün də
problemdir və ona görə də tez-tez monitorinq aparırlar. Yuri
Samxaradzeni nəqliyyat vasitəsində sərnişin sayının çox olmasına
inandıra bilmədik. O, qeyd etdi ki, indi onlarda sərnişin sayı
nisbətən azdır.
“Bizim mövqeyimiz belədir: heç bir sərnişin maskasız
olmasın – əgər nəqliyyat vasitəsinə maskasız minərlərsə, sürücüyə
xəbərdarlıq edilib ki, həmin sərnişini nəqliyyat vasitəsindən
düşürsün. Əgər sərnişin düşmək istəməzsə, sürücü maşını yerindən
tərpətməyəcək. Əgər hər hansı problem yaranarsa, sonra polis
çağırmalıdır. Sərnişin maşında oturur və arxada maskalarını
çıxarırlar, bir neçə dəfə mən yoxladım, özüm bir həftədir
monitorinq aparırdım. Onlara izah edirdim ki, maskanı
çıxarmasınlar, yenə çıxarırlar. Bu zaman sürücü önə baxsın, yoxsa
arxaya. Əgər görsə, həmin an xəbərdarlıq edir. Sanmıram ki, bizim
nəqliyyata çox sayda sərnişin minsin. Seçkilərdən sonra yenə
monitorinq aparacağam və özüm yoxlayacağam. Ancaq mən maşına
baxanda görürəm ki, indi sərnişinlər daha azdır”, –
“Ekspress Turist” MMC-nin rəhbəri Yuri Samxaradze bildirdi.
Qiqa Calağonia etiraf edir ki, onlar monitorinq zamanı
sərnişinlərin müəyyən edilmiş saydan artıq olmasını müşahidə
ediblər. Buna görə bir neçə dəfə müvafiq ölçülər də götürülüb.
“Vəziyyət bir az ağırdır, vətəndaşlar tövsiyələrə əməl
etmir, ancaq çalışırıq ki, hər şəkildə nəzarət edək. Sürücülərə
xəbərdarlıq edilib ki, sərnişinləri maskasız buraxmasınlar.
Avtobuslarda çox sayda sərnişin olması isə düşünmürəm ki, tez-tez
baş versin. Bir iki hal mümkündür, ancaq ona da nəzarət edirik.
Bizim cərimə tətbiq etmək hüququmuz yoxdur, ona görə də çalışırıq
ki, artıq və maskasız sərnişinləri düşürək və maşın yalnız bundan
sonra öz hərəkətinə davam edir. Sürücülərə xəbərdarlıq edirik, buna
hüququmuz var ki, cavab tələb edək, ancaq əksər hallarda onlar da
günahkar deyil”, – “Avtopark” MMC-nin direktoru Qiqa
Calağonia dedi.
Qeyd edək ki, “Avtopark” MMC Marneuli meriyasının balansında olan
nəqliyyat şirkətidir. “Ekspress Turist” isə özəl şirkətdir və
bələdiyyədə hərəkət edən 1 və 2 nömrəli xətlər bu şirkətə
məxsusdur.