T“Twitter” rəhbərliyi Çinin ABŞ-dakı səfirliyinin səhifəsində
paylaşım edilməsini məhdudlaşdırıb.
Bu barədə məlumatı “Bloomberg” nəşri yayıb.
Bildirilib ki, buna səbəb səfirliyin səhifəsində rəsmi Pekinin
Sincan Uyğur Muxtar Bölgəsi məsələsində yürütdüyü siyasətin
izahının paylaşılması olub.
Nəşrin məlumatına görə, həmin paylaşımdan bir gün sonra - yanvarın
7-də sosial şəbəkə qaydalarının pozuntusu ilə əlaqədar post
silinib. Paylaşımın yerində “tvit artıq əlçatan deyil” qeyd
olunub.
“Twitter” şirkətinin nümayəndəsi məsələ ilə əlaqədar nəşrin sualını
cavablandırıb
“Dehumanizasiyaya qarşı siyasətimiz pozulduğuna görə bu tvit ilə
bağlı müvafiq tədbirlər gördük”, - şirkətin adının açıqlanmasını
istəməyən əməkdaşı bildirib.
Müvafiq tədbirlər sonucunda yanvarın 8-dən bəri səfirliyin
səhifəsində paylaşımlar edilmir.
Xatırladaq ki, ötən il ABŞ-ın keçmiş prezidenti Donald Tramp
uyğurların hüquqlarının pozulması ilə bağlı Çinə sanksiya tətbiqinə
dair qanun imzalayıb. Çində uyğurların sıxışdırılmasında iştirak
edənlərin ABŞ-dakı bank hesabları dondurulub və onların Birləşmiş
Ştatlara səfəri qadağan edilib.
Qeyd edək ki, Çində uyğur türklərinə qarşı sistematik təqib
siyasəti yürüdülür. 2017-ci ildə Çinin Sincan-Uyğur Muxtar
Bölgəsində uyğurlar üçün siyasi-ideoloji təlim düşərgələri açılmağa
başlayıb. BMT-nin məlumatına görə, bu düşərgələrdə 1 milyondan çox
uyğur türkü saxlanılır. Rəsmi Pekin orada sadəcə Çin dili və
mədəniyyətinin öyrənilməsi, həmçinin peşəkar hazırlıq kurslarının
keçirildiyini iddia edir. Bununla belə, Çin orada uyğurların
vəziyyəti ilə bağlı dünya ictimaiyyətinə ətraflı məlumat verməkdən
çəkinir. Xeyli sayda məşhur uyğur alim, sənətkar və peşəkar
idmançıların həmin düşərgələrdə saxlanıldığı güman edilir.
Rəsmi Pekin uyğurların türk əsilliyini şübhə altına qoymaq üçün
aktiv təbliğat aparır.
Mənbə:report.az