თელავის საქალაქო სასამართლომ 18 წელი მიუსაჯა კაცს, რომელმაც ორი თანასოფლელი მოკლა. შემთხვევა 2023 წლის 4 ივლისს, გურჯაანის მუნიციპალიტეტში, სოფელ ველისციხელში მოხდა.

პროკურატურის ინფორმაციით, ბრალდებულ კაცს ფსიქიატრიული ექსპერტიზა ჩაუტარდა, რის შედეგადაც მას დანაშაულის ჩადენის მომენტში შეზღუდული შერაცხადობა დაუდგინდა.

“სასამართლო პროცესზე გამოკვლეული მტკიცებულებებით დადასტურდა, რომ 2023 წლის 4 ივლისს, გურჯაანის რაიონის სოფელ ველისციხის ცენტრში ბრალდებულმა ურთიერთშელაპარაკების ნიადაგზე არარეგისტრირებული პისტოლეტიდან გასროლით

ორ პირს ჭრილობები მიაყენა. მიყენებული დაზიანებების შედეგად ორივე დაზარალებული ადგილზე გარდაიცვალა”, – ვკითხულობთ უწყების მიერ გავრცელებულ განცხადებაში.

სასამართლომ კაცი დამნაშავედ ცნო სისხლის სამართლის კოდექსის 109-ე მუხლის ლ ქვეპუნქტით ჩადენილ დანაშაულში, რაც გულისხმობს დამამძიმებელ გარემოებებში ჩადენილ ორი პირის განზრახ მკვლელობას. ასევე, 236-ე მუხლის მე-3 და მე-4 ნაწილებით გათვალისწინებულ დანაშაულში – ცეცხლსასროლი იარაღისა და საბრძოლო მასალის მართლსაწინააღმდეგო შეძენა, შენახვა, ტარება.