ყოფილი პრემიერ-მინისტრის და პარტიის „გახარია საქართველოსთვის“ ლიდერის, გიორგი გახარიას განცხადებით, „ქართული ოცნების“ რეიტინგი მმართველი პარტიის შიდა კვლევებით 30-32%-ია.

გახარიას თქმით, ეს ინფორმაცია „ქართული ოცნების“ წყაროებიდან გამოვიდა.

ამის შესახებ მან „გახარიას კვირაში“ ისაუბრა.

„ძალიან კარგად იცის „ოცნებამ“, როგორი მხარდაჭერა აქვთ და როგორი მხარდაჭერა გვაქვს, მაგალითად, ჩვენ. მათი ჯიბის „გორბის“ გარდა, მათ ძალიან კარგად იციან, როგორი ტენდენციებია. ბოლო ინფორმაცია, რომელიც მაქვს მათი წყაროებიდან გამოსული, მათივე კვლევებით,

რომელიც ივანიშვილმა ჩაატარა იმისთვის, რომ გადაემოწმებინა ეს თავის სასაცილო, პატარა მშიშარა ბიჭები, მათ ძალიან კარგად იციან, რომ მათი მხარდაჭერა დაახლოებით 30-32%-ს შორის არის, შემდგომ მოდის „ნაციონალური მოძრაობა“. შემდგომ მოვდივართ ჩვენ, დაახლოებით, 15-17%-ით.

რა თქმა უნდა, ეს მათთვის არის უზარმაზარი შიში და პანიკა. რა თქმა უნდა, ისინი ყველა ეთერში იტყვიან, რომ ჩვენ გვაქვს 60% და გახარია ვერ გადალახავს ბარიერსო… იმიტომ, რომ ხომ უნდა დანერგონ ეს რაღაცნაირად. სასაცილოები არიან“, – აცხადებს გიორგი გახარია.

გახარიას თქმით, თუ 26 ოქტომბერს საპარლამენტო არჩევნებში მონაწილეობას 2 მილიონი ამომრჩეველი მიიღებს, „ქართული ოცნება“ 30%-იან ზღვარსაც ვერ გადალახავს. მისი თქმით, “ქართულ ოცნებას” 2012 წელს 1 200 000 ამომრჩეველმა მისცა ხმა, 2020-ში – 900 000-მა, ხოლო 2021-ში – 800 000-მა.

„დღეს [მათი რეიტინგი] არის 600 000. ამ ტენდენციას საქართველოს მოქალაქეები ხედავენ, როგორ მცირდებოდა და ცვდებოდა „ოცნების“ მხარდაჭერა და ამას თავისი ობიექტური მიზეზები ჰქონდა. შესაბამისად, რაც არ უნდა ილაპარაკონ, როგორი ზღაპრებიც და ტყუილებიც არ უნდა მოყვნენ, იმ შემთხვევაში, თუ 26 ოქტომბერს უბნებზე 2 მილიონი ამომრჩეველი მივა, მერწმუნეთ, რომ „ოცნება“ ვერ გადალახავს 30%-იან ზღვარსაც“, – აცხადებს გიორგი გახარია.

აღნიშნულ ინფორმაციას არ ადასტურებენ „ქართულ ოცნებაში“. როგორც „ქართული ოცნების“ წევრმა ლადო კახაძემ ნეტგაზეთს განუცხადა, მათი შიდა კვლევებით მმართველ პარტიას 60%-ზე მეტი მხარდაჭერა აქვს.