სამედიცინო ხალათები შესაძლოა საშიში ბაქტერიების გავრცელების კერად და მძიმე დაავადებების გამომწვევი მიზეზი გახდეს. ეს დასკვნა ამერიკელმა მეცნიერებმა კვლევის შედეგად გააკეთეს.

კვლევის შედეგად დადგინდა, რომ ექიმების ხალათების 50% ბაქტერიებით არის დაბინძურებული, რაც ადამიანებში რთულად განკურნებად დაავადებებს იწვევს, როგორიცაა სეფსისი და პნევმონია, - წერს  "imedinews"-ი The New York Times-ზე დაყრდნობით.

მკვლევარები ამბობენ, რომ ანალოგიური საფრთხის შემცველია სტეტოსკოპები, ტელეფონები და პლანშეტები - წერს გამოცემა.

კვლევაში აღნიშნულია, რომ ბაქტერიები აღმოაჩინეს ქირურგების ჰალსტუხებშიც. ასევე გაირკვა, რომ ექიმების ხალათებში ნაპოვნი ბაქტერიების 45% მათი პაციენტების ბაქტერიების ანალოგიურია.

პრობლემიდან გამოსავალს მეცნიერები ანტიბაქტერიული ქსოვილების გამოყენებაში ხედავენ, რომელიც ბაქტერიების რაოდენობის ზრდას ხელს უშლის. აშშ-ის ეპიდემიოლოგიის საზოგადოებამ გასცა რეკომენდაცია, რომ ექიმებმა არ უნდა ატარონ აქსესუარები იდაყვის ქვემოთ.

მკვლევარებმა აღნიშნეს, რომ საჭიროა მედპერსონალის ტანსაცმლის რეგულარული რეცხვა, რადგან ბაქტერიები რამდენიმე საათში სახლდებიან. კვლევის თანახმად აშშ-ში ექიმების 58% საკუთარ ხალათს თვეში ერთხელ რეცხავენ.