20 gün susuz — Marneulinin Çanaxçı kəndinin əhalisi kömək istəyir.

Marneulinin Çanaxçı kəndi sakinləri 20 gündən çoxdur ki, susuz qalıb. Yerli sakinlər məlumtsızlıqdan və diqqətsizlikdən şikayətlənir, yerli hakimiyyət isə problemin fevralın 26-dək həll ediləcəyini bildirir.

Gizliliyin qorunması şərti ilə kənd sakinləri bizə bildirirlər ki, onların vəziyyəti ilə heç kim maraqlanmır. Əhali hələ də sistemin sıradan çıxmasına konkret nəyin səbəb olduğunu və bərpa işlərinin niyə gecikdiyini bilmir.

Məlumatsızlıq səbəbindən kənddə müxtəlif versiyalar yayılıb: bəziləri boruların partladığını ehtimal edir, bəzilərinin sözlərinə görə isə sərhəddə yerləşən nasos zədələnib, lakin sərhədçilər işçilərə əraziyə daxil olmağa və işləri aparmağa icazə vermirlər.

"Kəndin kişiləri dəfələrlə həm icra nümayəndəsinə, həm də müvafiq quruma — "Marneuli Kənd Suları" MMC-yə müraciət ediblər, lakin mürciət nəticəsiz qalıb. Su təchizatı xidməti hər gün briqadanın gələcəyini deyir, amma heç kim gəlmir", — kənd sakini telefon söhbətində bildirir.

Yaranmış vəziyyətlə əlaqədar Çanaxçı kəndinin müvəkkili Qiqol Atabeqiani ilə əlaqə saxladıq. Onun izahatına görə, müvafiq briqada əraziyə gəlməyi və problemi fevralın 26-da aradan qaldırmağı planlaşdırır.

"Su nasosu zədələnib. Yeni ilə qədər iki dəfə təmir etdik, sonra yenə düzəltdik. Yəqin ki, keyfiyyətsiz kabel quraşdırılıb. Lakin bu sudan əlavə, bütün məhəllələrdə bulaq var. Kənd və xalq susuz qalmayıb", — müvəkkil qeyd edir.

"Bulaq suyu məişət ehtiyacları üçün kifayət etmir".

İcra nümayəndəsinin bu açıqlamasından sonra biz yenidən yerli sakinlərlə əlaqə saxladıq və 20 gün ərzində yalnız bulaq suyu ilə məişət ehtiyaclarını (yemək hazırlamaq, paltar yumaq, gigiyena) ödəməyin nə dərəcədə mümkün olduğunu soruşduq.

"Axı bu bulaqdır və suyu qablarla daşımalıyıq. İnsan paltar yumaq, çimmək və digər məişət ehtiyaclarını həll etmək üçün nə qədər su gətirməlidir? Bulaqdan gətirilən su ancaq içmək və yemək hazırlamaq üçün kifayət edə bilər", — kənddə cavab verirlər.

"Marneuli Kənd Suları" MMC-nin nümayəndəsi bizimlə söhbətində bildirdi ki, məsələni aydınlaşdırmaq üçün sabah, fevralın 26-da əraziyə gedəcəklər. Biz əhalinin 20 günlük susuzluğunun əsl səbəbinin nə olduğunu və su təchizatının nə vaxt tam bərpa olunacağını öyrənmək üçün yenidən şirkətlə əlaqə saxlayacağıq.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---