“Era Teatrı” yeni tamaşanın premyerasına hazırlaşır. Ukrayna əsilli, məşhur rus yazıçısı Nikolay Qoqolun “Bir dəlinin gündəliyi” əsərinin motivləri əsasında hazırlanan tamaşanın premyerası 17 sentyabr tarixində saat 15:30-da, Tbilisidə, Atoneli teatrında baş tutacaq. Tamaşanın quruluşçu rejissoru Anar Rafiqoğlu, baş rolun ifaçısı isə Əli İlqaroğludur. Tamaşanın rejissoru “Marneuli” radiosu ilə söhbəti zamanı qeyd etdi ki, həmin əsər nəinki Qoqolun, eyni zamanda teatr tarixinin ən önəmli əsərlərindən biri hesab olunur.

“Hansı ki, bu tamaşa bir çox ölkələrdə, istər Avropada istərsə də digər ölkələrdə səhnələşdirilib və nümayiş etdirilib. Bizim çoxdan bəri arzu etdiyimiz, planlaşdırdığımız bir tamaşadır. Mən deyərdim ki, təxmini olaraq iki ildən çoxdur, bunu hazırlamaq istəyirdik. Lakin pandemiyaya görə, zamanında planlarımız təxirə düşdü. Tamaşanın premyerası indi olacaq. Daha öncə “Era teatrı”nda belə bir əsər nümayiş olunmayıb. Əslində olduqca çox köhnə, klassik, bədii bir əsər olsa da, bizim buralar üçün bu tamaşa yeni sayılır. Tamaşanın saatını da ona görə seçdik ki, regiondan gələn izləciyələrimiz üçün əlverişli olsun”.

Anar Rafiqoğlunun dediyinə görə, tamaşanı hazırlamaq onlar üçün çox çətin olub. Ona görə ki, onlar tamaşaya parklarda hazırlaşıblar.

“Mən illər öncə aktyor kimi, daha sonra rejissor kimi fəaliyyət göstərmişəm və indiyə qədər bir çox tamaşaların hazırlanmasında yer almışam. Mənim çətinliklə hazırladığım tamaşalarım çox olub. Bu, onlar içərisində ən çətin şəraitdə hazırladığım tamaşadır deyə bilərəm. Sosial şəbəkələrdəki hesablarmızda da paylaşımlar etmişik. Bildiyiniz kimi, "Era teatrı" artıq bir neçə aydır ki, məkansız qalıb. Bizim bir yerə toplaşaraq, məşq etmək üçün məkanımız yoxdur. Son zamanlar tamaşalarımızı parklarda hazırlayırıq. Bu tamaşa da parklarda hazırlanıb. Əlbəttə bizim üçün çətin oldu. Parklarda ətrafdan gələn səs-küy, bəzən ətrafdan baxan insanların qəribə baxışları, bunların çərçivəsində tamaşa hazırlamaq çox çətindir. Nə edək, belə oldu. Bundan da narazı deyilik. Əksinə, hər zaman qeyd edirdim ki, bu şəraitdə tamaşa hazırlana biləcəyini bütün ölkəyə və cəmiyyətə göstərmək istəyirəm. Bu tamaşanın heç bir maddi dəstəkçisi yoxdur. Tamaşa "Era teatrı"nın öz hesabına və imkanlarına hazırlanıb”.

“Bir dəlinin gündəliyi” əsərindən əlavə onların hazırladığı başqa bir tamaşa yenə var. Rafiqoğlunun dediyinə görə, artıq həmin tamaşa da premyeraya hazırdır.

“Bizim bu tamaşadan öncə hazırlığına başladığımız tamaşa mövcuddur. Həmin tamaşanın rejissorluğunu bizim teatrın direktoru Namiq Hacıyev edir. Tamaşa Azərbaycan klassiklərindən olan Əbdürrəhim bəy Haqverdiyevin “Kimdir müqəssir” pyesi əsasında hazırlanıb. O tamaşa demək olar ki, hazırdır. Sadəcə olaraq tamaşanın premyerası üçün son hazırlıq işləri gedir. Böyük ehtimalla bu tamaşanın premyerasından sonra, o tamaşanın da premyerası baş tutacaq. Hər iki tamaşa Azərbaycan dilində olacaq”.

Anar Rafiqoğlunun dediyinə görə, biletlər yaxın günlərdə satışa çıxarılacaq. Biletlərin nə vaxt satışa çıxarılacağı və haradan əldə olunacağı ilə bağlı məlumatlar “Era teatrı”nın sosial media hesablarında paylaşılacaq.