“Ermənistan öz müstəqilliyini, suverenliyini və ərazi bütövlüyünü bütün

mümkün yollarla müdafiə edəcək. Azərbaycan ordusu Ermənistan Respublikasının işğal olunmuş ərazilərindən çıxmalıdır”, - Nikol Paşinyanın rəhbərlik etdiyi Ermənistan Təhlükəsizlik Şurasının sentyabrın 19-da bəyanatında deyilir.

Təhlükəsizlik Şurasının fikrincə, “Azərbaycanın təcavüzkar siyasəti regionda sülhün bərqərar edilməsi, regional kommunikasiyaların açılması, Dağlıq Qarabağ probleminin hərtərəfli həlli, Ermənistanın problemi zorakılıq yolu ilə həll etməyə məcbur edilməsi

səylərinə qarşı yönəlib. Azərbaycanın təhdid və məcburetmə siyasəti qəbuledilməzdir. Biz beynəlxalq ictimaiyyəti işğalı dayandırmaq üçün Azərbaycana daimi təzyiq göstərməyə çağırırıq”, - Təhlükəsizlik Şurasının bəyanatında deyilir.

Ermənistan-Azərbaycan sərhədində tərəflər arasında qarşıdurma sentyabrın 13-də başlayıb. Ermənistana görə, Azərbaycan onların ərazisini bombalayıb, müəyyən yüksəklikləri işğal edib. Bundan başqa, Ermənistan tərəfinin məlumatına görə, toqquşmalar nəticəsində həlak olan və itkin düşən əsgərlərin sayı 207-yə çatır. Həmçinin 200-dən çox yaralı var.

Azərbaycan tərəfi hərbi toqquşmanın Ermənistanın təxribatı nəticəsində baş verdiyini iddia edir.

Ermənistan tərəfinin təşəbbüsü ilə Amerika Birləşmiş Ştatlarında Ermənistan və Azərbaycan xarici işlər nazirləri arasında görüş keçirilib və tərəflər öz mövqelərini təqdim ediblər.

Mənbə: Netgazeti