Parlamentin spikeri Şalva Papuaşvili ABŞ vizası olub-olmaması və ABŞ-dan viza məhdudiyyəti ilə bağlı məlumat alıb-almaması ilə bağlı suala konkret cavab vermir.

Dünən, iyunun 3-də müxalifətçi deputat Xatia Dekanoidzenin “Ailə üzvlərinə vizaların ləğvi ilə bağlı artıq konkret mesajlar alan “Gürcü arzusu”nun nümayəndələri var” məlumatından sonra jurnalistlər bu barədə parlament sədrinə sual veriblər.

Jurnalistlər Papuaşvilidən ABŞ Dövlət Departamentinin sözçüsü Metyu Millerin bəyanatı, xüsusən də sanksiyaları gözləyib-gözləmədiyini soruşublar. O, həmçinin özünün ABŞ vizası olub-olmadığını və viza məhdudiyyəti ilə bağlı elektron məktub alıb-almadığını cavablandırması istənilib.

Jurnalistlərin bir neçə sualına baxmayaraq, Papuaşvili sualın yalnız Metyu Millerin bəyanatı ilə bağlı olan hissəsini cavablandırıb.
Papuaşvilinin dediyi kimi, başqa ölkənin sənin haqqında nə qərar verəcəyi ilə bağlı öz gündəliyini qurmaq düzgün deyil. O, bu kontekstdə müxalifət nümayəndələrini tənqid edərək, müxalifətin “xarici dövlətin şantajına məruz qaldığı siyasətçilərlə” dolu olduğunu qeyd edib.

“Sanksiya hədələrinə gəlincə, sanksiyalar Gürcüstan üçün yeni deyil. Biz onilliklər ərzində müxtəlif sanksiyalara məruz qalmışıq, o cümlədən Rusiya sanksiyalar vasitəsilə gürcü xalqına təsir göstərməyə çalışıb. Bu, gürcü xalqı ilə rus üslubunda danışmaqdır və bunun heç kimə sərfəli olacağını düşünmürəm”, - Papuaşvili bildirib.

---

“Gürcü Arzusu” bir daha “Rusiya qanununu” qəbul etməyi planlaşdırır. Həmin qanun 2023-cü ilin mart ayında kütləvi etirazlar nəticəsində geri çəkilmişdi. “Gürcü Arzusu” ötən il vəd vermişdi ki, “Rusiya qanunu” Parlamentə qaytarmayacaqlar. Amma vədi pozublar. “Gürcü Arzusu” qanun layihəsinin ilkin formasından yalnız “agent” sözünü çıxarıb və onu xarici maraqların daşıyıcısı ilə əvəz edib.
Qanuna görə, gəlirinin 20%-dən artığı xaricdən əldə olunan bütün QHT və media təşkilatlar xarici qüvvələrin maraq daşıyıcısı hesab olunurlar. Dövlət bu təşkilatların fəaliyyətini və məqsədlərini araşdırmayacaq, onların hamısına xarici qüvvələrin maraq daşıyıcısı adını verəcək.
Qanun sivil ölkələrdə olduğu kimi düşmən əhval-ruhiyyəli ölkələrdən gələn maliyyəyə deyil, Avropa və Amerikadan gələn maliyyəyə istiqamətlənib.
Qanunun irəli sürülməsinə görə, Avropa İttifaqı üzvləri və Gürcüstanın dost ölkə liderləri öz təəccüblərini bildiriblər, Rusiya Prezidentinin mətbuat katibi isə “Gürcü Arzusu”-nun qanununu bəyənib.