ABŞ Dövlət Departamentinin İnvestisiya Mühiti Hesabatına əsasən, Gürcüstanda biznes və investisiya şərtləri ümumilikdə yaxşıdır, lakin kommersiya işlərinə müstəqil, vaxtında və səriştəli baxılması üçün məhkəmə sektoruna inamsızlıq qalmaqdadır.

Hesabatda deyilir ki, bəzi biznes mübahisələri illərlə məhkəmələrdə uzanır.

“Digər şirkətlər bələdiyyələr səviyyəsində qərarların qəbulu proseslərinin səmərəsiz olmasından, effektiv antiinhisar siyasətinin olmamasından, siyasi müdaxilə iddialarından, qanun və qaydaların seçmə tətbiqindən,

o cümlədən kommersiya qanunları və mülkiyyət hüquqları ilə bağlı mübahisələrin həllində çətinliklərdən şikayətlənirlər. Gürcüstan hökuməti bu problemlərin həlli istiqamətində fəaliyyətini davam etdirir və mövcud problemlərə baxmayaraq, Gürcüstan bizneslə məşğul olmaq üçün əlverişli yer kimi regionda yüksək yer tutur”, - deyə hesabatda bildirilir.

Hesabatda həmçinin bildirilir ki, Gürcüstan Rusiyanın Ukraynaya təcavüzündən sonra Şərq-Qərb Orta Dəhlizi boyunca artan ticarətdən yararlanmağa çalışır, çünki ölkə üçün prioritet sektorlar tranzit və logistikadır.

“Genişlənən Mərkəzi Asiya bazarı həmçinin Avropanı Mərkəzi Asiya bazarlarına birləşdirən Orta Dəhliz vasitəsilə yükdaşımaların son dövrlərdə artmasına səbəb olub və Gürcüstan üçün uzunmüddətli artım mənbəyi ola bilər, xüsusən də strateji infrastruktur investisiyaları və regional əməkdaşlıq vasitəsilə. 2023-cü ilin fevralında Gürcüstan hökuməti Anaklia limanının inkişafı üçün yeni tender elan edib, onun ilkin tenderi 2020-ci ildə hökumət tərəfindən ləğv edilib”, - məlumatda deyilir.