"Gürcü Arzusu" partiyasının baş naziri İrakli Kobaxidze və prezident Mixeil Kavelaşvili Azərbaycan Respublikası Milli Məclisinin sədri Sahibə Qafarova ilə görüşüblər.

"Gürcü Arzusu" partiyasının məlumatına görə, görüşdə Gürcüstan və Azərbaycan arasındakı strateji tərəfdaşlıq, birgə regional layihələr və iqtisadi əməkdaşlıq məsələləri müzakirə olunub:

"Yanvar ayında İrakli Kobaxidze və Azərbaycanın Baş nazirinin həmsədrliyi ilə keçirilən Gürcüstan-Azərbaycan Hökumətlərarası İqtisadi Əməkdaşlıq Komissiyasının 10-cu iclasının effektivliyi qeyd olundu. Həmçinin yüksək səviyyəli səfərlərin əməkdaşlığın dərinləşdirilməsindəki əhəmiyyətinə diqqət yetirildi. Tərəflər Orta Dəhlizin səmərəli fəaliyyətinin təşviqi məsələsini də müzakirə etdilər".

Görüşdə Cənubi Qafqaz regionunda sülh və sabitliyin vacibliyi vurğulanıb. Gürcüstanın baş naziri Gürcüstanın gələcəkdə də regionda sülhün və rifahın təmin olunmasına töhfə verməyə hazır olduğunu bəyan edib.

Kavelaşvili Azərbaycan nümayəndə heyəti ilə Orbeliani Sarayında görüşüb.

Rəsmi məlumata görə, Orbeliani Sarayında keçirilən görüşdə tərəflər iki ölkə arasında tarixi möhkəm dostluq əlaqələrini və Gürcüstan-Azərbaycan strateji tərəfdaşlığının əsas istiqamətlərini müzakirə ediblər:

"İki ölkə arasında müxtəlif beynəlxalq və regional formatlarda uğurlu əməkdaşlığın əhəmiyyəti vurğulandı. Cənubi Qafqaz regionunda baş verən hadisələr barədə də fikir mübadiləsi aparıldı. Mixeil Kavelaşvili Gürcüstanın Cənubi Qafqazda sülh və sabitliyi dəstəklədiyini və bu prosesə töhfə verməyə hazır olduğunu bildirdi. Görüşdə Gürcüstan, Azərbaycan və Türkiyə arasındakı üçtərəfli əməkdaşlıq məsələsinə də xüsusi diqqət yetirildi".