Çin və Gürcüstan arasında uçuşların tezliyi artıb, yeni aviareyslərin əlavə olunması mümkündür.

Çin və Gürcüstan arasında uçuşların tezliyinin artması və yeni avia marşrutların əlavə olunması mümkündür. Bu barədə Gürcüstanın İqtisadiyyat və Davamlı İnkişaf Nazirliyinin yaydığı məlumatda bildirilir.

Nazirliyin məlumatına görə, İqtisadiyyat və davamlı inkişaf nazirinin müavini İrakli Nadareişvili Çin Xalq Respublikasının Mülki Aviasiya Administrasiyasının nümayəndə heyəti ilə görüşüb. Nümayəndə heyətinə Çin Mülki Aviasiya Administrasiyası direktorunun müavini Xan Zun rəhbərlik edib.

Nazirliyin yaydığı məlumata əsasən, görüşdə Çin və Gürcüstan arasında mülki aviasiya sahəsində əməkdaşlığın dərinləşdirilməsi məsələləri müzakirə olunub. Xüsusilə uçuşların tezliyinin artırılması və yeni avia marşrutların açılması imkanları müzakirə edilib.

Nazir müavini İrakli Nadareişvili bildirib ki, Çinlə strateji tərəfdaşlıq iki ölkə arasında iqtisadi əməkdaşlığa, o cümlədən mülki aviasiya kimi sahələrə müsbət təsir göstərir. Onun sözlərinə görə, bu sahədə həm uçuşların sayı, həm də sərnişin axını artır.

“Biz mülki aviasiya sahəsində Çinlə əlaqələrin daha da genişlənməsində maraqlıyıq. Həm Çin, həm də Gürcüstan aviaşirkətləri ölkələr arasında aviasiya bazarlarının inkişafında və fəaliyyətin genişləndirilməsində artan maraq göstərirlər. Ölkələr arasında vizasız rejimin tətbiqi sərnişin axınının artmasına ciddi təsir göstərib,” – deyə İrakli Nadareişvili qeyd edib.

İqtisadiyyat Nazirliyinin məlumatına görə, görüşdə qeyd olunub ki, 2024-cü ildə iki ölkə arasında hava nəqliyyatı ilə 57 184 sərnişin daşınıb ki, bu da 2023-cü illə müqayisədə 45% artım deməkdir. Bu ilin ilk beş ayının göstəricilərinə əsasən, Gürcüstan və Çin arasında 29 212 sərnişin daşınıb ki, bu da ötən ilin eyni dövrü ilə müqayisədə 91% artım təşkil edir.

Məlumat üçün qeyd edək ki, hazırda Çin və Gürcüstan arasında müntəzəm sərnişin reyslərini China Southern Airlines və Air China həyata keçirir. Bu reyslər Urumçi–Tbilisi–Urumçi marşrutu üzrə həftədə 10 dəfə yerinə yetirilir.