Necə gəldi, necə getdi – Temur Abazovun 8 aylıq merliyi
Bu
gün, 12 fevral tarixində məlum oldu ki, Marneuli meri Temur
Abazovun vəkilləri Marneuli Bələdiyyə Məclisinə onun istefası ilə
bağlı məktubla müraciət ediblər.
Bələdiyyə Məclisi prosedur olaraq məktubu
arayış olaraq qəbul etməli və onun səlahiyyətlərini
dayandırmalıdır.
Prokurorluq Temur Abazovu 14 iyun tarixində Marneuli sakini Elçin
Allahverdiyevə qarşı qeyri-insani və alçaldıcı rəftarda ittiham
etmişdi.
Məsələ sosial şəbəkədə yayılmış video ilə bağlı idi ki, həmin
videoda da Elçin Allahverdiyev öz sidiyi ilə üzünü yumağa və öz
ailə üzvlərini söyməyə məcbur edilmişdi.
Bu video zərərçəkən Allahverdiyevin Vahid Milli Hərəkatın üzvləri
ilə birlikdə Tbilisidə etiraz aksiyasında olduğu zaman Abazovun
həyat yoldaşı və Bidzina İvanişvilini “Facebook” canlı yayımında söydüyü videoya qarşılıq olaraq
çəkilmişdi.
Abazov yeddi ay ərzində ilkin həbsdə olub. Dekabrda məhkəmə Abazovu
girov qarşılığında azad edib. Vəkillərin sözlərinə görə,
prokurorluq ona qarşı ittihamları sübuta yetirə bilmir və yalnız
Elçin Allahverdiyevin ifadəsini əsas gətirir.
Marneulililər Temur Abazovun adını
ilk dəfə 2017-ci il yerli özünüidarə seçkilərində Bələdiyyə
Məclisinin hazırkı sədri Amiran Qiorqadzenin merliyə namizədliyi
geri çəkilən zaman duymuşdu. Amiran Qiorqadze isə öz namizədliyinin
geri çəkilməsini ilk olaraq “Marneuli” radiosunun jurnalistlərindən
eşitmişdi. Onun namizədliyinin geri çəkilməsi Tbilisidə “Gürcü
Arzusu”nun mərkəzi ofisi qarşısında etiraz aksiyasına səbəb
olmuşdu.
Marneulinin majoritar deputatı Tamaz
Naverianinin də aksiyaya qoşulmasına və AMiran Qiorqadzenin
namizədliyinin geri çəkilməsinə etiraz etməsinə baxmayaraq, mərkəzi
ofisdə Temur Abazovun namizədliyini təsdiqləmişdilər.
Sakinlər Temur Abazov
barədə nə bilirdi?
Temur Abazov Daxili İşlər Nazirliyinin əməkdaşı idi. O, Marneuli
merliyinə Gürcüstanın Azərbaycandakı səfirliyindəki hərbi attaşe
vəzifəsindən gəlmişdi.
Abazovun namizədliyinin təqdimatı:
Onun tərəfindən təqdim olunmuş xülasədə qeyd olunub ki, o, 2012-ci
ildə MArneulidə Bidzina İvanişvilinin seçki qərargahına rəhbərlik
edib. Abazov həqiqətən də “Gürcü Arzusu”nun bugünkü rəhbəri Bidzina
İvanişvili baş nazir kimi Novruz Bayramında iştirak etmək üçün
gələn zaman Marneulidə olmuşdu.
Mərkəzi Seçki Komissiyasının məlumatlarına əsasən, Abazov bir aylıq
seçki kampaniyası nəticəsində 71% səs toplamışdı.
Onun ilk iş günü və görüşü Qaçağan kəndində baş tutmuşdu. Həmin
görüş Abazovun cinsiyyətçi ifadəsi ilə yadda qalmışdı. Görüşdə
yalnız kişilər iştirak edirdilər və o, “yəqin indi həyat
yoldaşlarına yemək hazırlayırlar” ifadələrini işlətmişdi. Abazovun
bu ifadələrinə xalq müdafiəçisi Uça Nanuaşvili münasibət
bildirmişdi və bu ifadələri “seksist” adlandırmışdı.
Həyata keçirilmiş konkret dəyişikliklər:
Marneulidə küçə ticarəti ilə mübarizə Temur Abazovun adı ilə
bağlıdır. Bu məsələ ilə bağlı dəfələrlə müzakirələr aparılmışdı. O,
alternativ yollar tapmaq üçün küçə ticarətçilərinə vaxt
vermişdi.
Onun saxlanılmasından sonra isə küçə ticarəti məsələsi meriyada bir
daha müzakirə olunmadı.
Abazov xalqla daha yaxın olmaq üçün öz şəxsi maşını ilə Marneuli
mərkəzi meydanınadək gəlirdi, sonra isə yoluna bələdiyyə avtobusu
ilə davam edirdi.
Onun arzularından biri də xalqın vəzifəli şəxsləri daha asan
tanıması və müraciət etməsi üçün Marneuli meriyasının
əməkdaşlarının xüsusi forma geyməsi idi.
Temur Abazov Marneuli meri vəzifəsində 8 ay qaldı. Qanunvericiliyə
əsasən, onun istefasından sonra Marneulidə rəsmi olaraq mer
seçkiləri keçiriləcək. Seçkilər yazda baş tuta bilər. Namizədlərin
kimliyi isə güman ki, onun istefasının rəsmiyyət qazanmasından
sonra məlum olacaq.