Marneulidən olan bir qrup könüllü gənc kəndlərdə görüşlər keçirərək
sakinləri koronavirusla bağlı məlumatlandıracaqlar.
Görüş zamanı gənclər sakinlərə koronavirus təhlükəsi haqqında
danışacaq və ölkənin son vəziyyəti ilə bağlı məlumat verəcəklər.
Qrupun təsisçisi Rəşan Ziyadəliyev “Gündəlik-Gürcüstan” səhifəsində
canlı yayımı zamanı bildirdi ki, könüllü qrupda iştirak edən
gənclər xüsusi geyim və maskalardan istifadə edəcəklər və sakinlərə
ölkədəki vəziyyətin ciddi olduğundan danışaraq onlara evdə qalmağın
daha təhlükəsiz olması ilə bağlı məlumat verəcəklər.
Ziyadəliyev bildirdi ki, BMT də onlara kömək edir və gənclər xüsusi
fondlar tərəfindən geyimlər və kəndlərə yollanmaq üçün nəqliyyat
ilə təmin olunacaqlar.
Onun sözlərinə görə, dövlət qurumlarına hər hansı məsələ üçün zəng
edildikdə və qarşı tərəf dövlət dilini bilmədiyində azərbaycan
dilində danışmalı olur. Bu zaman həmin şəxs dövlət dilini
bilmədiyinə görə, öz fikrini düzgün şəkildə çatdıra bilmir. Ona
görə də gənclər “Call Center” adlı qrup yaradıblar və ehtiyac
olduğu halda gəncləri yönləndirərək orada xidmət göstərmələri üçün
imkan yaradıblar. Ziyadəliyev bildirir ki, hazırda iki nəfər
könüllü gənci 112-ki xidmətinə yönləndiriblər. Şənhəyat Sadiqova və
Aytən Yusibova iki həftə ərzində xidmətdə çalışacaqlar.
Rəşan Ziyadəliyev koronavirus təhlükəsi haqqında danışaraq əhaliyə
məsuliyyətli olmalarını və evdə qalaraq özləri ilə birlikdə
ətrafdakı insanları da qorumalarının vacib olduğunu bildirib.
Qeyd edək ki, Marneuli və Bolnisi bələdiyyələri ciddi karantin
rejiminə keçib. Qeyd olunan qərar Marneulidə bir qadının
koronavirusa yoluxmasından sonra verilib.