Bu gün, 12 may tarixində Marneuli teatrında bir illik fasilədən
sonra "Marina Revia" tamaşasının premyerası baş tutub.
Tamaşa bir ailənin münasibətlərindən, yadlaşmasından, sevgidən,
soyuqluğundan bəhs edir.
Rejissor Qoça Xviçianın sözlərinə görə, tamaşanın premyerası ötən
ilin mart ayında baş tutmalı idi. Ancaq pandemiyaya görə premyera
təxirə salındı.
"Tamaşa bir az fərqli formada təqdim olunacaq. Hər şey
evdə oynanılacaq. Burada, evdə tamaşaçılar əyləşib və faktiki
olaraq evin kar divarlarının funksiyasını yerinə
yetirirlər", – Qoça Xviçia bildirdi.
Tamaşanın premyerasında Marneuli meriyasının nümayəndələri,
Parlamentin Marneuli və Qardabani seçki dairəsindən majoritar
deputatı Zaur Darğallı da iştirak edirdi. Zaur Darğallı "Marneuli"
radiosu ilə söhbəti zamanı bildirdi ki, tamaşa Marneulinin yaxşı
formalaşmış teatr truppası olduğunu bir daha sübut etdi.
"Sevinirəm ki, Marneuli Mədəniyyət Mərkəzində fəaliyyət
göstərən yaxşı teatr truppası yaradılıb. Biz bu gün yüksək
səviyyədə hazırlanmış tamaşa izlədik. Bu tamaşa üzərində
pandemiyaya qədər işləyirdilər. Ancaq təqdimat keçirə bilmədilər.
Çox sevinirəm ki, bu gün bu möhtəşəm tamaşanı izlədik”,
– Zaur Darğallı bildirdi.
Tamaşa izləyicilər tərəfindən bəyənilib. Mariam Conelidze
“Marneuli” radiosu ilə söhbəti zamanı bildirdi ki, tamaşa bir illik
fasilədən sonra bütün tamaşaçıların gözlədiyi emosiyanı
qaytarıb.
"Bu qədər pauzadan sonra teatrı sevən hər kəs üçün bu
emosiyalar mühüm idi. Bu emosiyaları bizim möhtəşəm aktyorlarımız,
rejissor və bütün komandamız yaşatdı. Bu həqiqətən də möhtəşəm
tamaşa idi. Hamıya təşəkkürümü bildirirəm", – Mariam
Conelidze bildirdi.
"
Mən şəxsən zövq aldım. Yəqin tamaşanı izləyən hamı
belə olardı. Mənim üçün çox emosional idi. Xüsusən sonluq. İstərdim
Marneulidə belə axşamlar tez-tez olsun", ؘ– Ani
Nozade bildirdi.
Tamaşa 13 və 14 may tarixində saat 16:00-da da nümayiş etdiriləcək.
Rejissorun sözlərinə görə, tamaşanın başlama vaxtı komendant
saatından irəli gələrək müəyyən edilib ki, Tbilisidən gələn
izləyicilər geri qayıda bilsin.