13 oktyabr tarixində Sadaxlı kəndində yol-nəqliyyat hadisəsi baş
verib.
Hadisə zamanı Sadaxlı kənd sakini təxminən 40 yaşlarında olan qadın
yolda hərəkət edən 60 yaşlı nənə və onun 13 yaşlı nəvəsini vurub.
Hadisə şahidlərinin “Marneuli” radiosuna verdikləri məlumata görə,
hadisə qəsdən törədilib.
Mənbədən verilən məlumata görə, hadisəni törədən qadının evində 1-2
ay əvvəl gecə yarısı tapançadan atəş açıblar. Bu isə ətrafda
yaşayan qonşuları narahat edib. Nəticədə nənənin yaşadığı ailə
hadisəni polisə xəbər verib. Qadın isə hadisənin polisə
bildirilməsindən narahat olub. Buna görə də onun nənə və nəvəni
qəsdən avtomobillə vurduğu güman olunur.
“1-2 ay bundan əvvəl həmən qadının evində atəş
açmışdılar. Gecə saat 1 radələrində atəş açıblar. Həmin qadının
evində nə yoldaşı, nə də oğlu yoxdur. Yoldaşından ayrılıb. Bunu da
polisə şikayət ediblər. Qadının hadisəni polisə danışan ailədən
incikliyi var idi ki, niyə evimdə atəş açıldığını dövlətə
bildirmisiniz. Bu prinsipə görə də dünən uşağı və qadını vurub. Üç
dörd gün əvvəl də 3 nəfər məhəllədə söhbət edirlərmiş, qadın maşını
onların da üstünə sürüb. O insanları da qorxudub. Məhəllədə
oğlanlara, kişilərə söyüşlər söyür. Qadın olduğu üçün də heç kim
ona yaxınlaşmır”, – adının hallanmasını istəməyən
mənbə deyir.
Onun məlumatına görə, hazırda zərərçəkən nənə və nəvə xəstəxanadan
evə buraxılıb. Nənənin vəziyyəti yaxşıdır. Lakin 13 yaşlı
yeniyetmənin qoluna gips qoyulub və o, psixoloji sarsıntı yaşayıb.
Yeniyetmənin hələ də hadisənin təsirindən çıxa bilmədiyi
bildirilir.
Polis əməkdaşları hadisəni törədən qadının avtomobilini cərimə
meydançasına aparıblar. Məlumata görə, qadın məsuliyyətə cəlb
olunmayıb.