Tbilisidə yerləşən dövlət universitetlərində yeni tədris ilinin auditoriyalarda başlayacağı gözlənilir.

Bu səbəbdən də paytaxta uzaq olan regionlardan gələn tələbələr məcburiyyət qarşısında qalaraq Tbilisidə kirayə ev tutmalı olurlar. Paytaxtda kirayə ev axtarışında olan Marneulili tələbələrin də sayı az deyil.

Tələbələrin əksəriyyəti düşünür ki, Ukraynaya hücumdan sonra Rusiyaya tətbiq edilmiş sanksiyalar şəraitində Gürcüstana gəlmiş rus turistlərin artmasına görə evlərin kirayə qiyməti artıb. Hətta ev sahiblərinin evi lari deyil, dollarla kirayə verdiyini deyənlər də var.

Tələbələrin sözlərinə görə, kirayə evlərin qiyməti əvvəlki illə müqayisədə ikiqat artıb.

“Çox çətinlik çəkirik. İki aydır ki, kirayə gəzirik. O yer qalmadı ki, baş çəkməyək. Bu gün ev tuturduq. Sabah daha artıq qiymət verən olurdu və ev sahibi evi həmin şəxsə verməli olurdu. Ən ucuz ev 750-800 laridir. Keçən il bu qiymət 350-400 idi. Bu bir həftə ərzində bir az qiymətdə azalma müşahidə olunur. Qiymətin artmasında iki səbəb görürəm. Artıq hamı kirayə evləri tutub. İkinci səbəb isə turistlərin Gürcüstana axın etməsində görürəm.”

Kirayə axtaran tələbələrdən birinin sözlərinə görə, bu günə qədər 8 evə zəng vurublar. Lakin heç birindən müsbət cavab ala bilməyiblər. O, deyir ki, nisbətən normal qiymətə ev tapanda isə həmin ev həm dövlət universitetlərinə, həm də metroya uzaq məsafədə yerləşir.

Onların sözlərinə görə, son günlərdə ev sahibləri evlərini Rusiya və Ukrayna vətəndaşlarına kirayələməyə daha çox üstünlük verirlər. Səbəb isə onların daha artıq ödəniş etməsidir.

“Azərbaycanlı olduğumuzu eşidib ya evi başqasına verdilər, ya da telefona cavab vermədilər. Bir ev sahibinin bəhanəsi isə o idi ki, mən qadınlara ev vermirəm. 3-4 ay əvvəl 400 lariyə olan 1 otaqlı evlər hazırda 600-700 lari olub. Heç cür ev tapa bilmirik. Tbilisinin girəcəyində zorla bir ev tapmışdıq. Hansı ki, həmin ev o pula dəymirdi. Qiyməti iki qat artırıblar. Ayın sonlarında universitetlər açılır, amma hələ də tələbələr ev tapa bilməyiblər. Deyirlər ki, Ukraynadan qaçqınlar gələcək. Ev sahibləri də evlərini onlara saxlayırlar ki, daha baha qiymətə verə bilsinlər. Kasıbçılıq baş alıb gedir biz indiki vaxtda nə edə bilərik?!”

“Gürcüstan vətəndaşlarından daha çox Rusiya və Ukrayna vətəndaşlarına üstünlük verilir. Ukraynalıları başa düşürük, bəs rusları necə?!”

“Artıq bir aydır ki, ev axtarıram, amma tapa bilmirəm.”

“20 gündür ev axtarırıq. Amma tapmaq mümkün deyil. Evlər əvvəlkinə baxanda 60-70% bahalanıb. Ən əsası da maksimum iki-üç nəfərə verirlər. 4-5 nəfər deyəndə hamısı dəliyə dönür. Fikirləşən yoxdur ki, tələbəyik və adam başı bir evə 400-500 lari verə bilmərik. Bizim bundan başqa xərclərimiz də var və ailələrimiz üçün də çətindir. Elə ailə var, iki-üç uşağı təhsil alır. Və həqiqətən çarəsiz qalmışıq. Nə edək, bilmirik.”

Qeyd edək ki, Tbilisi Dövlət Universitetinin tələbələrinin bir qismi may-aprel aylarında tədris prosesinin bütövlükdə auditoriyada keçirilməsinə etiraz edir və 2021-2022-ci tədris ili bitənə qədər təhsilin hibrid modelə keçirilməsini tələb edirdilər. Xatırladaq ki, tələbələr aksiyanı paytaxtda kirayə evlərin qiymətlərinin artmasına görə keçirirdilər.

Məlumat üçün bildirək ki, bu il Azərbaycan dilində ümumi qabiliyyət imtahanından 1 207 nəfər minimal keçid balını toplaya bilib. Minimal keçid balını toplayan abituriyentlərdən 981 nəfəri universitetə qəbul olub.