Gürcüstan Daxili İşlər Nazirliyinin verdiyi məlumata görə, Mestiyanın Nakar kəndi yaxınlığında baş vermiş hücum nəticəsində itkin düşən şəxsin cəsədi Nakra çayında tapılıb. Məlumata görə, cəsədi tapılan şəxs Rusiya vətəndaşıdır və onun axtarış tədbirləri indiyədək davam edirdi. Həmin şəxs və onun xanımı üzərinə hücum edilməsi ilə bağlı məlumat yanvarın 5-də yayılmışdı.

Nazirlik bildirir ki, cinayət işi ilə əlaqədar iki nəfər saxlanılıb. Onların xarici ölkə vətəndaşına odlu silahla xəsarət yetirdikləri, onu qanunsuz şəkildə azadlıqdan məhrum etdikləri və cinayətin izlərini ört-basdır etmək məqsədilə cəsədi çaya atdıqları müəyyən olunub.

“İstintaqla müəyyən olunub ki, 2024-cü il yanvarın 5-də saxlanılan şəxslər, Zuqdididən Mestiyaya gedən iki xarici ölkə vətəndaşını qarət ediblər. Onların mobil telefonlarını ələ keçirərək, 1986-cı il təvəllüdlü V.S.-yə odlu silahla xəsarət yetirib və onu qanunsuz şəkildə azadlıqdan məhrum ediblər. Cinayətin izlərini ört-basdır etmək məqsədilə cəsədi çaya ataraq hadisə yerindən qaçıblar,” – deyə DİN-in açıqlamasında qeyd olunur.

Gürcüstan Daxili İşlər Nazirliyi cinayət işi üzrə istintaqı Gürcüstan Cinayət Məcəlləsinin 179-cu (qrup halında qarət), 19-109-cu (ağırlaşdırıcı hallarda qəsdən adam öldürməyə cəhd) və 236-cı (qanunsuz odlu silah əldə etmə, saxlama və daşıma) maddələri ilə aparır.

Cinayət 16 ildən 20 ilədək azadlıqdan məhrumetmə və ya ömürlük həbs cəzası ilə nəticələnə bilər.

Hadisə zamanı itkin düşən şəxsin xanımı bildirib ki, iki silahlı şəxs onlara hücum edərək silah çəkib və yolun qarşısını kəsiblər.

Məlumata görə, cütlük Mestiyanın Tetnuldi zirvəsinə doğru hərəkət edirdi. Yolda qar səbəbindən avtomobili saxlayıb, tunel yaxınlığında foto çəkməyə başlayıblar. Həmin vaxt ağ rəngli “Subaru” markalı avtomobil onların yanına yaxınlaşıb və köməyə ehtiyaclarının olub-olmadığını soruşub. Cavab olaraq, cütlük kömək lazım olmadığını, sadəcə foto çəkdiklərini bildirib. Daha sonra həmin avtomobil onlara yenidən rast gəlib və bu dəfə daha şübhəli hərəkətlər edib.

Zərərçəkən xanım Alina bildirib ki, avtomobil əvvəlcə yolda durub, daha sonra sürücü Viktorun təklif etdiyi köməyi qəbul ediblər. Lakin bu, bir müddət sonra münaqişə ilə nəticələnib və iki dəfə silah səsi eşidilib. Alina baş verənləri belə izah edir:

“Bu hadisə məni və yoldaşım Viktorun başına gəldi. Bizim üç telefonumuz var idi: ikisi ona, biri isə mənə məxsus idi. Onun telefonlarını dərhal götürdülər, mənim telefonumu isə gizlətməyə müvəffəq oldum. Onlar mənə silahla təhdid edərək telefonumu tələb edirdilər. Bu qorxunc bir hadisə idi.”

Rusiya vətəndaşlarına qarşı hücum barədə ilkin məlumat yanvarın 5-də yayılmışdı. Əvvəlcə bildirilirdi ki, silahlı şəxslər Mestiyanın Nakar kəndi yaxınlığında Rusiya vətəndaşı ər-arvada hücum ediblər. Daha sonra avtomobil hadisə yerində aşkar olunub, qadın isə polisə gətirilib.