Մառնեուլիի քաղաքապետ Դաուր Իսմայիլովը և նրա տեղակալ Գիորգի Գոդաբրելիձեն չեն մեկնաբանում Պետական անվտանգության ծառայության կողմից քաղաքապետարանի վարչական ծառայության աշխատակից Ռիմա Օթարաշվիլիի նկատմամբ առաջադրված մեղադրանքը։

Մարտի 9-ին տարածված տեղեկատվության համաձայն՝ Վրաստանի պետական անվտանգության ծառայությունը Ռիմա Օթարաշվիլիի դեմ քննություն է սկսել՝ նախնական համաձայնությամբ խմբի կողմից առանձնապես խոշոր չափի խարդախության փորձի փաստով։

Քննությամբ պարզվել է, որ Մառնեուլիի մունիցիպալիտետում գտնվող

20 000 քմ հողատարածքի մի քանի մասերի բաժանման և սահմանազատման հարցը իբր Մառնեուլիի քաղաքապետարանում դրական լուծելու դիմաց քաղաքապետարանի վարչական ծառայության աշխատակիցը և նրա վստահված անձը քաղաքացուց պահանջել են 60 000 ԱՄՆ դոլար, որից նախապես վերցրել են 5 000 ԱՄՆ դոլար։ — նշված է Պետական անվտանգության ծառայության հայտարարության մեջ։

Ռիմա Օթարաշվիլիին Պետական անվտանգության ծառայությունը չի ձերբակալել։ Մարտի 9-ին «Ռադիո Մառնեուլի»-ին աղբյուրը հայտնել էր, որ Օթարաշվիլին դեռ գտնվում էր քաղաքապետարանի շենքում։

Պետական անվտանգության ծառայության տարածած տեսանյութում լսվում է, թե ինչպես է Ռիմա Օթարաշվիլին քաղաքացուն ասում, որ նրա գործը, որի համար պահանջել էր 60 000 դոլար, 100%-ով կլուծի, և հայտարարում է, որ «այս գործի հիմնական ֆիգուրներից մեկը նաև քաղաքապետը կլինի»։

Մի քանի օր է փորձում ենք հարցազրույց վերցնել Մառնեուլիի քաղաքապետից և նրա տեղակալից։ Լրագրողները ցանկանում էին պարզել՝

ինչու՞ էր Մառնեուլիի «Կանանց սենյակի» ղեկավար Ռիմա Օթարաշվիլին ներգրավված հողերի ձևակերպման հարցերում, ինչու՞ է նա խարդախության փորձի ժամանակ հիշատակում Մառնեուլիի քաղաքապետին, և արդյո՞ք նա շարունակում է աշխատել քաղաքապետարանում։

Դաուր Իսմայիլովը և Գիորգի Գոդաբրելիձեն չեն պատասխանել հեռախոսազանգերին։ Մարտի 12-ին, երբ լրագրողները այցելել են Մառնեուլիի քաղաքապետարան, նրանք նույնպես չեն ցանկացել հանդիպել լրագրողի հետ։ Տեղեկությունը, որ մեկնաբանություն չեն տալու, փոխանցվել է հասարակության հետ կապերի բաժնի աշխատակցի միջոցով։