Gürcüstan prezidenti Salome Zurabişvili bildirib ki, o, müxalifətə rəhbərlik etməyi planlaşdırmır, lakin müxalifət partiyalarını Avropa platforması ətrafında birləşdirmək istəyir.

"Mən müxalifətin lideri olmayacağam. Bəziləri bu yolu seçməyimi istəyir, amma mən bunu düzgün qərar hesab etmirəm", - prezident Londondakı Kral Beynəlxalq Münasibətlər İnstitutu Chatham House tərəfindən təşkil edilən müzakirə zamanı moderatorun sualına cavab verərkən deyib.

Salome Zurabişvilinin sözlərinə görə, əhalinin əksəriyyəti artıq hakim gücü dəstəkləmir və həmçinin “Milli Hərəkat”ın geri qayıtmasını istəmir.

"Əhalinin təxminən 50%-i heç bir güc istəmir və gözləyir ki, müxalifət partiyaları birlikdə nə dərəcədə yaxşı fəaliyyət göstərə biləcəklər. Bu o demək deyil ki, onlar bir siyahı və ya bir partiya altında birləşməlidirlər, bu, real deyil və olmayacaq. Birgə hərəkət etməyi bacarsınlar. Bu onların işidir. Mənim işim onlara deməkdir ki, bir-birinizlə birləşməyin lakin Avropa platforması ətrafında bir olun”, - deyə o bildirib.

Fevralın 6-da prezident Salome Zurabişvili parlamentdə illik məruzə ilə çıxış edərkən bildirib ki, o, “Avropa üçün birlik platforması” – “Gələcəyin Xartiyası” yaradır. O, bu məsələdən danışmağa 2024-cü il seçkilərinin vacibliyini vurğulayaraq başlayıb. Xüsusilə, o bildirib ki, “bu, bir partiyanı digərinə, bu və ya digər proqramı, bu və ya digər lideri seçdiyimiz adi bir seçki olmayacaq”, lakin bu, “tarixdə həlledici mərhələ olacaq, burada öz seçimimizi müəyyənləşdirməliyik”. Prezident “bu proseslərin müşahidəçisi, qaynaqçısı və nəzarətçisi” olmağa hazır olduğunu bildirib.

Prezidentin təşəbbüsünü “Gürcüstan Naminə” partiyası istisna olmaqla, digər müxalifət partiyaları bölüşür.