“Onun əməkhaqqı dini bayram olduğuna görə kəsilməyib.
Əməkhaqqı Parlament iclasında iştirak etmədiyinə görə
kəsilib”,
– Gürcüstan Parlamentinin çoxluqdan olan üzvü, Prosedur Məsələləri
Qaydaları Komitəsinin sədri İrakli Kadaqişvili Parlamentin müstəqil
deputatı Tariel Nakaidzenin sözlərinə belə cavab verib.
Nakaidze bildirmişdi ki, Qurban bayramından Parlamentin iclasında
iştirak etmədiyinə görə onun əməkhaqqından 10% kəsiblər. “Marneuli”
radiosu 4 gün idi ki, Parlamentdən cavab gözləyirdi. Bu gün İrakli
Kadaqişvili bizimlə söhbəti zamanı bildirdi ki, bu məsələni dinlə
əlaqələndirmək düzgün deyil.
“Parlamenti iclasında iştirak etməmək hansı hallarda
üzrlü hesab olunur, bu barədə reqlamentdə açıqlama verilib.
Parlamentin iclasında müsəlman və ya xristian, yaxud başqa hansısa
bayram olanda dini səbəbə görə iştirak etməmək üzrlü səbəb
sayılmır. Bir daha təkrar edirəm, reqlament hansı hallarda üzrlü
səbəb hesab olunduğunu aydın şəkildə müəyyən edir. Bu halda bu
məsələnin dini bayramla heç bir əlaqəsi yoxdur. Mən bir xristian
olaraq hansısa xristian bayramına görə iclasda iştirak etməsəm,
mənim də əməkhaqqımdan kəsilməlidir. ya da yəhudi və ya başqa dinin
nümayəndəsi Parlamentin iclasında iştirak etmirsə, həmin gün dövlət
tərəfindən elan edilmiş istirahət günü deyilsə, yenə belə
olmalıdır. Adətən fövqəladə iclas deyilsə, istirahət günlərində
iclas olmur. Buradan irəli gələrək bunun dini məsələ ilə heç bir
əlaqəsi yoxdur. Cənab Tariel Parlament üzvü olaraq bilməlidir ki,
reqlamentin tələbi necədir”, – Kadaqişvili
bildirib.
Gürcüstan Parlamentinin üzvü Tariel Nakaidze bildirib ki, Qurban
bayramında Parlamentin iclasında iştirak etmədiyinə görə
əməkhaqqından 500 lari kəsiblər. Baxmayaraq ki, əvvəlki günlərdə
Parlamentdə ictimai şəkildə mühüm bayramı qeyd etdiyinə görə
iclasda iştirak etməyəcəyini bildiribmiş, yenə də vəziyyəti nəzərə
almayıblar, maaşından kəsiblər. Parlamentin deputatı düşünür ki, bu
ayrı-seçkilik və qeyri-bərabər yanaşmadır.
“27 iyun tarixində Parlamentin plenar iclası baş tutanda mən
bildirdim ki, 28 iyunda sessiyada ola bilməyəcəyəm. Çünki həmin
tarixdə müsəlmanların Qurban bayramıdır. Bildirdim ki, bu ölkədə
etnik azlıqların öz bayramlarını qeyd etmək imkanı olmalı və həmin
günlər istirahət günü elan edilməlidir. Bu bir növ aksiya idi.
Düzünü desəm, ümid edirdim ki, bunu nəzərə alacaqlar və üzrlü səbəb
hesab edəcəklər. Amma mail ünvanıma gələn cavabda konkret olaraq
üzrlü səbəb hesab edilmədiyi qeyd olunmuşdu və müvafiq olaraq
nəzərə almadıqlarını deməyə əsasım var. Bu sadəcə mənim üçün çox
mühümdür və niyə problem olduğunun yeganə aşkar nümunəsidir.
Məsələn, bir dominant dinin elan edilmiş bir neçə dini bayramı var,
istirahət günü elan edilmiş dini bayramları var və heç bir başqa
dini azlıqların belə şəraiti yoxdur. Bu ümumi qanunla diskriminativ
yanaşmadır. Bu düzgün deyil, əgər hansısa din ən az bir gün çox
mühüm bayramdan yararlanırsa, başqa dini azlıqlar da
yararlanmalıdır”, – Parlamentin üzvü bildirir.
Tariel Nakaidze indi işlə bağlı hüquqi mübahisə və qanunvericilik
təşəbbüsü hazırlamağı planlaşdırır. O, təşəbbüsü güman ki, payızda
Parlamentə təqdim edəcək.
Mövzu ilə bağlı digər xəbər:
Parlamentə 500 lari dəyərində “ianə” – dini
azlıqlar bayram günlərində istirahət edə bilirlərmi?